अकरावीची प्रवेश आजपासून

म. टा. प्रतिनिधी, नगर

जिल्ह्यामध्ये अकरावीची प्रवेशप्रक्रिया सोमवारपासून सर्वच ज्युनिअर कॉलेजांमध्ये सुरू होणार आहे. प्रवेशासाठी आवश्यक असणारा अर्ज व माहितीपत्रक हे विद्यार्थ्यांना मोफत उपलब्ध करुन देण्याचा आदेश माध्यमिक शिक्षण विभागाने दिला आहे. जिल्ह्यामध्ये अकरावीच्या स्वयंअर्थसहाय्यित कॉलेजांच्या मिळून तब्बल ७८ हजार १७० जागा असल्यामुळे यंदा कोणताही विद्यार्थी प्रवेशापासून वंचित राहणार नसल्याचे शिक्षण विभागाने स्पष्ट केले. परंतु यंदा दहावीच्या निकालाचा टक्का वाढल्यामुळे पसंतीचे कॉलेज व शाखा मिळवण्यासाठी विद्यार्थ्यांना धावपळ करावी लागेल.

दहावीच्या विद्यार्थ्यांना २४ जून रोजी गुणपत्रक देण्यात येणार आहे. परंतु अकरावीचे वर्ग सुरू होण्यास उशीर होऊ नये, यासाठी शिक्षण विभागाने विद्यार्थ्यांकडे असणाऱ्या ऑनलाइन निकालाची छायांकित प्रत ग्राह्य धरून प्रवेश प्रक्रिया राबवण्याचा निर्णय घेतला. त्यानुसार सोमवारपासून प्रवेश प्रक्रिया सुरू करण्यात येईल.

सोमवारी सकाळी अकरा वाजल्यापासून विद्यार्थ्यांना प्रत्येक ज्युनिअर कॉलेजांमध्ये प्रवेश अर्ज वाटण्यात येतील. तर, प्रवेश अर्ज व माहिती पुस्तकाचे शुल्क न घेण्याच्या आदेश दिल्यामुळे यंदा काही कॉलेजांनी आपले प्रवेश अर्ज हे वेबसाइटवर टाकले आहेत. विद्यार्थ्यांना या अर्जाची प्रिंट काढून ती कॉलेजांमध्ये जमा करावी लागेल. कॉलेजांमध्ये प्रवेश अर्ज जमा करण्यासाठी विद्यार्थ्यांना २४ ते २९ जूनपर्यंत मुदत देण्यात आली असून तीन जुलै रोजी अंतिम गुणवत्ता यादी प्रसिद्ध करण्यात येईल. दरम्यान, अकरावीच्या प्रवेशामध्ये कोणतेही गैरप्रकार होऊ नये, यासाठी शिक्षण विभागाचे पथक कार्यरत राहणार आहे.

नगर तालुक्यात ‘नो-कॉमर्स’

जिल्ह्यामध्ये अनुदानित व विनाअनुदानित एकूण ३०२ उच्च माध्यमिक विद्यालये असून यापैकी जामखेड तालुक्यात ८ व नगर तालुक्यात १७ कॉलेज आहेत. परंतु जामखेड तालुक्यामध्ये असलेल्या कॉलेजांमध्ये कला शाखेच्या ६४० तर विज्ञान शाखेच्या ८८० जागा आहेत. याशिवाय या तालुक्यामध्ये संयुक्त १६० जागा आहेत. तर, नगर तालुक्यातील कॉलेजांमध्ये कला शाखेच्या १ हजार ३६० व विज्ञान शाखेच्या ५६० जागा आहेत. या दोन्ही तालुक्यांमध्ये वाणिज्य शाखेच्या जागा नसल्यामुळे येथील वाणिज्य शाखेला प्रवेश घेण्याची इच्छा असणाऱ्या विद्यार्थ्यांना इतर तालुक्यातील कॉलेजांमध्ये अर्ज करावे लागणार आहेत. तर, जिल्ह्यामध्ये एकूण ९४ स्वयंअर्थसहाय्यित कॉलेज असून याठिकाणी १४ हजार ६५० जागा आहेत. यापैकी ४ हजार ३८० जागा कला शाखेच्या ७ हजार ८९० जागा विज्ञान शाखेच्या व २ हजार ३८० जागा वाणिज्य शाखेच्या आहेत.