गुणवत्तायादीची घोषणा आज

म. टा. प्रतिनिधी, नगर

अकरावीच्या प्रवेशाच्या प्राथमिक गुणवत्तायादीवर आक्षेप घेण्याची मुदत संपली असून शुक्रवार (२४ जून) रोजी जिल्ह्यातील सर्वच ज्युनिअर कॉलेजांमध्ये अंतिम गुणवत्तायादी प्रसिद्ध करण्यात येणार आहे. अंतिम गुणवत्ता यादीनुसार कॉलेजांमध्ये २५ व २७ जून रोजी विद्यार्थ्यांना प्रवेश देण्यात येणार असून त्यानंतर गरज पडल्यास २८ जून रोजी प्रतीक्षा यादी क्रमांक एक प्रसिद्ध करण्यात येणार आहे.

जिल्ह्यातील अकरावी प्रवेशाचा पहिला टप्पा २० जून रोजी पूर्ण झाला असून कॉलेजांमध्ये २१ जून रोजी प्राथमिक गुणवत्तायादी प्रसिद्ध करण्यात आली होती. या यादीवर आक्षेप घेण्यास विद्यार्थ्यांना २२ व २३ जून असे दोन दिवस देण्यात आले होते. आक्षेप घेण्यासाठी दिलेल्या मुदतीमध्ये विद्यार्थ्यांनी प्राथमिक गुणवत्ता यादीमध्ये टक्केवारी कमी येणे, आरक्षणानुसार गुणवत्ता यादीमध्ये स्थान न मिळणे, आरक्षणाचा प्रवर्ग चुकणे, नाव चुकणे, अशा अनेक त्रुटी काढल्या आहेत. या सर्व त्रुटी दुरुस्त करून शुक्रवारी सकाळी ११ ते सायंकाळी ५ पर्यंत कॉलेजांना अंतिम गुणवत्तायादी प्रसिद्ध करण्याचा आदेश देण्यात आला आहे. त्यामुळे प्राथमिक गुणवत्तायादीमधील त्रुटी दुरुस्तीचे काम गुरुवारी उशिरापर्यंत कॉलेजांमध्ये चालू होते. दरम्यान, अंतिम गुणवत्तायादी प्रसिद्ध झाल्यानंतर अकरावीचा कट-ऑफ नेमका किती आहे, हे स्पष्ट होणार आहे.

विनाअनुदानित जागांवरील प्रवेश ८ जुलैनंतर
जिल्ह्यामध्ये स्वयंअर्थसहाय्यित कॉलेज वगळता अकरावीचे अनुदानित १५८, तर विनाअनुदानित १४४ ज्युनिअर कॉलेज आहेत. तसेच, काही अनुदानित कॉलेजांमध्ये अकरावीची प्रत्येकी एक विनाअनुदानित तुकडी चालवण्यास परवानगी देण्यात आली आहे. परंतु, अकरावीला प्रवेश देताना सर्वात प्रथम अनुदानित जागा भरण्याच्या सूचना शिक्षण विभागाने दिल्या आहेत. त्यामुळे नामवंत अनुदानित कॉलेजमध्ये अकरावीचा कट-ऑफ वाढल्यामुळे प्रवेशापासून वंचित राहणाऱ्या विद्यार्थ्यांना विनाअनुदानित जागेवर प्रवेश घेण्यासाठी ८ जुलैपर्यंत थांबावे लागणार आहे.