पाच हुतात्मा स्मारकांसाठी ३५ लाखांचा निधी

म. टा. प्रतिनिधी, नगर

जिल्ह्यातील पाच हुतात्मा स्मारकांजवळ मुलभूत सुविधा उपलब्ध करून देण्यासाठी ३५ लाख ७८ हजार ७१० रुपयांचा निधी देण्यात आला आहे. जिल्हा प्रशासनाने बांधकाम विभागाकडे हा निधी वर्ग केला आहे.

हुतात्मा स्मारकांचे परीरक्षण व निगा योजनेअंतर्गत वर्ष २०१७-१८ साठी निधी देण्यात आला आहे. यामध्ये चिंचपूर इजदे (ता. पाथर्डी), गोवर्धनपूर (ता. श्रीरामपूर), धुमाळवाडी (ता. अकोले), शेलद (ता. अकोले) व अहमदनगर शहरातील हुतात्मा स्मारकासाठी प्रत्येकी ७ लाख १५ हजार ७४२ रुपये निधी देण्यात आला आहे. हा निधी स्मारकांच्या फरसबंदीमध्ये फ्लोरिंग एकसमानता ठेवणे, विद्युतीकरण करणे यासह स्वयंपाकघर, बेसिन व बाथरूम, खिडक्या, हॉल, पत्रे, सेप्टीक टँक, सोलर पंप, नादुरुस्त टाक्या बसवणे, पन्हाळे बसवणे अशा मुलभूत कामांसाठी खर्च करण्यात येणार आहे. या कामांसाठी प्रशासकीय मान्यता देणे, निवीदा प्रक्रिया पार पाडणे व अन्य प्रशासकीय बाबी सार्वजनिक बांधकाम विभागाच्या वतीने पूर्ण करण्यात येणार आहेत. याशिवाय एखादे स्मारक सुस्थितीत असल्यास निधीचा वापर करू नये, अशा सूचनाही देण्यात आल्या आहेत.