कर्जत : कर्जत तालुक्यातील खेड येथील परिवर्तन इंटरनॅशल स्कूल या शाळेमध्ये फी भरली नाही म्हणून विद्यार्थ्याला प्रवेश नाकारल्याचे समोर आले आहे. विद्यार्थ्यांचा शाळा सोडल्याचा दाखला मागणी करूनही दिला जात नाही, यामुळे संबधित संस्थेचे अध्यक्ष व मुख्याध्यापक आणि कर्मचारी यांच्यावर फोस्को कायद्याने गुन्हा नोदवून कारवाई करावी, अशी मागणी अमोल अशोक सरतापे यांनी कर्जत तहसीलदारांकडे लेखी तक्रारी अर्ज देवून केली आहे.
या अर्जामध्ये सरतापे यांनी पुढे म्हटले आहे की, त्यांचा मुलगा दिगंबर अमोल सरतापे हा परिवर्तन इंटरनॅशल स्कूलमध्ये शिक्षण घेत आहे. तो सातवीमध्ये पास झाला आहे. माझ्या वडिलांचे थायरॉईडचे ऑॅपरेशन करण्यासाठी पैसे लागत होते ते नातेवाइकांकडून वर्गणी करून भरले. मात्र, यामुळे मुलाची फी भरता आली नाही. या मुळे शाळेने मुलाचा प्रवेश रद्द केला आहे. मी शाळेची फी भरू शकत नसल्याने मुलाचा दाखला परत मागितला. मात्र, शाळा दाखलाही देत नाही. इतर मुले शाळेत जाताना पाहून माझा मुलगा रोज रडत असून त्याच्या मानसिकतेवर त्याचा गंभीर परिणाम होत आहे . जर दाखला मिळाला तर इतर शाळेमध्ये प्रवेश घेता येईल अन्यथा त्याचे शैक्षणिक नुकसान होण्याचा धोका आहे. या मुळे त्याचा दाखला शाळेने तातडीने देणे बंधनकारक असताना दिला जात नाही. यामुळे शाळेचे संस्थापक, मुख्याध्यापक व इतर कर्मचारी यांच्यावर गुन्हा दाखल करावा, अशी मागणी सरतापे यांनी केली आहे .