आरोपीचा आत्महत्येचा प्रयत्न

म. टा. प्रतिनिधी, नगर
न्यायालयात जामिन न मिळाल्याने सराईत मंगळसूत्र चोर करण नरेंद्रसिंग कोहली (वय ४१, रा. तपोवन रोड) याने स्वतःच्या गळ्यावर ब्लेड मारुन आत्महत्त्येचा प्रयत्न केला. शुक्रवारी सायंकाळी साडेपाच वाजता सबजेल कारागृहातील आरोपी नोंदणी टेबलजवळ ही घटना घडली. याबाबत कोतवाली पोलिस स्टेशनमध्ये सरकारी कामात अडथळा आणल्याप्रकरणी गुन्हा दाखल करण्यात आला आहे.
सावेडी परिसरामध्ये मंगळसूत्र चोरीचा प्रयत्न करताना करण कोहली याला पोलिसांनी पकडले होते. शुक्रवारी त्याला न्यायालयामध्ये हजर केले होते. यावेळी न्यायालयाने त्याला न्यायालयीन कोठडीत ठेवण्याचा आदेश दिला. त्यानुसार पोलिस कोहली याला सबजेल येथे घेऊन गेले. यावेळी सबजेल येथील आरोपी नोंदणी टेबल जवळ कोहली याने त्याच्याकडे असणाऱ्या अर्धवट ब्लेडने स्वतःच्या गळ्यावर मारुन आत्महत्त्येचा प्रयत्न केला. तसेच पोलिसांना ‘तुम्ही नोकरी कशी करता’, असा दम दिला. दरम्यान, याबाबत पोलिस नाईक सुभाष खंडू गायकवाड यांनी दिलेल्या फिर्यादीनुसार कोतवाली पोलिस स्टेशनमध्ये सरकारी कामात अडथळा आणणे, आत्महत्त्येचा प्रयत्न करणे, असा गुन्हा दाखल केला असून पुढील तपास सहायक पोलिस निरीक्षक राहुलकुमार पाटील करीत आहे.

पैसे चोरणाऱ्या आरोपीला नागरिकांनी पकडले

नगर : ज्येष्ठ महिलेच्या हातातून रोकड हिसकावून पळणाऱ्या आरोपीला नागरिकांनी पकडले. भिंगार येथील संभाजीनगर भागात शनिवारी दुपारी तीन वाजण्याच्या सुमारास ही घटना घडली. याबाबत भिंगार कॅम्प पोलिस स्टेशनमध्ये आरोपी सचिन चार्लस मिरपगार (वय ३८, रा. शास्त्रीनगर, ता. शेवगाव) याच्या विरोधात गुन्हा नोंदवण्यात आला.
भिंगार येथील स्टेट बँक ऑफ इंडिया शाखेमधून २४ हजार रुपये एक वृद्ध महिलेने काढले. हे पैसे आपल्याजवळ असणाऱ्या एका पिशवीमध्ये घेऊन ती घरी जात होती. ही महिला संभाजीनगर येथे आली असता स्टेट बँकेपासून तिचा दुचाकीवर पाठलाग करणाऱ्या सचिन मिरपगार याने महिलेच्या हातातील पैशाची पिशवी हिसकावली. यावेळी सदर महिलेने आरडाओरडा केला. त्यावेळी घरासमोर उभ्या असलेल्या सदर महिलेल्या भावाच्या मुलाने व त्याच्या मित्राने सचिन मिरपगार याचा पाठलाग सुरू केला, व याबाबत पोलिसांना माहिती दिली. त्यानंतर नागरिक व पोलिसांनी मिळून सदर आरोपीला पकडले. सहाय्यक पोलिस निरीक्षक विनोद चव्हाण यांच्यासह दीपक पाठक, भाऊसाहेब काळे, राजेंद्र गायकवाड, नितीन गांगुर्डे, ज्ञानेश्वर शिंदे यांनी ही कामगिरी केली.