आरोपीच्या वकिलाला धमकी

नगर ः कोपर्डी बलात्कार व खून खटल्यातील आरोपी नितीन भैलुमे याचे वकील प्रकाश आहेर यांना जीवे मारण्याची धमकी देण्यात आली आहे.
कोपर्डी खटल्यात तिन्ही आरोपींना न्यायालयाने दोषी ठरविल्यानंतर दोषींच्या शिक्षेबाबतच्या सुनावणीला मंगळवारी सुरुवात झाली होती. या घटनेतील एक आरोपी नितीन भैलुमे याला कमीत कमी शिक्षा देण्याची मागणी त्याचे वकील प्रकाश आहेर यांनी केली होती. मंगळवारी आहेर यांचा न्यायालयातील युक्तीवाद पूर्ण झाला. मंगळवारी रात्री साडेदहा वाजण्याच्या सुमारास आहेर हे संगमनेर येथील आपल्या घरी असताना त्यांना फोन करून जीवे मारण्याची धमकी देण्यात आली. पुन्हा कोर्टात जाऊन आरोपीला फाशी द्यावी, असा युक्तिवाद करा, अन्यथा संपवून टाकू, अशी धमकी त्यांना देण्यात आली. याबाबत आहेर यांनी संगमनेर पोलिस स्टेशनमध्ये तक्रार दिली आहे. तक्रारीमध्ये आहेर यांनी फोन करून धमकी देणाऱ्यांचे मोबाइल नंबर सुद्धा टाकले असून पोलिसांनी अदखलपात्र गुन्ह्याची नोंद केली आहे.