नीलक्रांती चौकातील खड्डेदुरुस्ती सुरू

म. टा. प्रतिनिधी, नगर

मनपाच्या वतीने नीलक्रांती चौकातील खड्डे बुजवण्याचे काम गुरुवारपासून सुरू करण्यात आले आहे. त्यामुळे या परिसरातील नागरिकांना काही प्रमाणात दिलासा मिळाला आहे. परंतु, अद्यापही शहरातील इतर भागांतील खड्ड्यांच्या प्रश्न कायम असून तो तातडीने सोडवण्याची मागणी होत आहे.

मध्यवर्ती शहरात जाण्यासाठी सर्वात महत्त्वाचा रस्ता म्हणून लालटाकी रस्ता ओळखला जातो. या रस्त्यावर निलक्रांती चौकाजवळ मोठमोठे खड्डे पडल्यामुळे या परिसरातील कॉलेज विद्यार्थ्यांसह दिल्लीगेट परिसरातून प्रवास करणाऱ्या नागरिकांना येथून वाहने चालवताना कसरत करावी लागत होती. त्यामुळे सातत्याने येथील खड्डे बुजवण्याची मागणी मनपाकडे करण्यात येत होती. गेल्या तीन ते चार दिवसांपासून सातत्याने पाऊस चालू असल्यामुळे नीलक्रांती चौकातील खड्ड्यांमध्ये पाणी साचल्याने येथील प्रवास अधिकच धोकादायक बनला होता. अखेर, गुरुवारी मनपाच्या वतीने नीलक्रांती चौकातील खड्डे खडी टाकून बुजवण्यात आले आहेत. त्यामुळे कॉलेज विद्यार्थ्यांसह नागरिकांची समस्या काही प्रमाणात सुटली आहे.

इतर रस्त्यांवरील प्रश्न कायम

नगर शहरातील बहुतांश रस्त्यांवर मागील महिना-दीड महिन्यांपासून खड्डे झाले आहेत. पावसाच्या पाण्याने भरलेल्या खड्ड्यांच्या खोलीचा अंदाज येत नसल्याने छोटी-मोठी वाहने आदळण्याचे व नुकसान होण्याचे प्रकार वाढले आहेत. तक्रारी वाढल्यामुळे काही भागात मुरुम टाकून खड्डे बुजवण्यात आले होते. परंतु, त्यामुळे रस्त्यावर चिखल झाला असून नागरिकांचा प्रवास खडतर बनला आहे.