दहा आधार केंद्रांवर जिल्ह्यात कारवाई

म. टा. प्रतिनिधी, नगर
नागरिकांना आधार नोंदणी करण्याची सुविधा प्रशासनाने मोफत उपलब्ध करुन दिली असली तरी काही केंद्र चालक मात्र नियमांचे उल्लंघन करत नोंदणीसाठी पैसे घेत आहे. आधार नोंदणीसाठी पैसे घेतले जात असल्याच्या तक्रारी मिळाल्यानंतर प्रशासनाने कारवाईस सुरुवात केली आहे. जिल्ह्यातील दहा केंद्र चालकांना प्रत्येकी पन्नास हजार रुपये दंड ठोठावला आहे.

नागरिकांना आधार नोंदणीसाठी जिल्ह्यात आधारकार्ड नोंदणी केंद्र सुरू करण्यात आले आहेत. या केंद्रांकडून आधार नोंदणीचे काम केले जात असले तरी नियमांची मोडतोड करण्याची प्रवृत्तीही वाढीस लागली आहे. पहिल्यांदाच आधारकार्डसाठी नोंदणी करणाऱ्या नागरिकांकडून कोणतेही शुल्क घेतले जात नाही. त्यांच्यासाठी नोंदणी मोफत आहे, असे असताना केंद्र चालकांकडून मात्र अवास्तव शुल्क घेतले जात असल्याचे निदर्शनास आल्याने ही कारवााई करण्यात आली आहे. यामध्ये श्रीगोंदा तालुक्यात चार, अकोले एक, नगर एक, पारनेर दोन व राहता तालुक्यातील दोन अशा एकूण दहा केंद्र चालकांवर कारवाई करण्यात आली आहे. या केंद्र चालकांकडून प्रत्येकी पन्नास हजार रुपये याप्रमाणे पाच लाख रुपये दंड वसूल करण्यात येऊन नवी दिल्लीतील संबंधित आधार केंद्र भारत विशिष्ट पहचान प्राधिकरणाकडे जमा करण्यात आल्याचे उपजिल्हा निवडणूक अधिकारी अरुण आनंदकर यांनी सांगितले.