म. टा. प्रतिनिधी, नगर
नगर तालुका पोलिस स्टेशन व राज्य उत्पादन शुल्क विभागाने संयुक्तरित्या नेप्ती गावात छापा टाकून गावठी हातभट्टी दारूवर कारवाई केली. एक हजार लिटरचे कच्चे रसायन व तयार दारू असा ८० हजार रुपयांचा मुद्देमाल हस्तगत करण्यात आला. गुरुवारी ही कारवाई करण्यात आली.
सहायक पोलिस निरीक्षक किशोरकुमार परदेशी, पोलिस उपनिरीक्षक डी. आर. नेरकर व राज्य उत्पादन शुल्क विभागाचे अधिकारी एस. एन. सराफ, डी. सी. आवारे, वाय. बी. मडके यांनी नेप्ती गावातील हातभट्टी दारूवर छापा टाकला. हातभट्टी दारू तयार करणारे हौशिराम कारभारी जपकर, बाबा बहिरु जपकर (रा. नेप्ती, ता. नगर) या दोघांना ताब्यात घेण्यात आले. त्यांच्याकडून दारू तयार करण्यासाठीचे घातक कच्चे रसायन, ड्रममध्ये तयार दारू आढळून आली. ही दारू पोलिस व राज्य उत्पादन शुल्कने नष्ट केली आहे. या दोघांविरुद्ध मुंबई दारूबंदी कायद्यानुसार गुन्हा नोंदविण्यात आला आहे. ते बेवारस आढळून आलेल्या दारूसाठ्याबाबत राज्य उत्पादन शुल्क विभागाने तीन गुन्हे नोंदविले आहेत.