सव्वातीन लाख बालकांना आधार

म.टा.प्रतिनिधी,नगर

नगर जिल्ह्यात लोकसंख्येच्या तुलनेत १०२ टक्के आधार नोंदणी झाली असून, त्यात जिल्ह्यातील अंगणवाडी बालकांपैकी सव्वा तीन लाख बालकांची आधार नोंदणी करण्यात आली असून, अजूनही तीस हजार बालके आधार नोंदणीविना आहेत. उर्वरित बालकांची आधार नोंदणी करण्याबाबत प्रशासनाकडून मोहीम राबविण्यात येत आहे.

जिल्ह्यातील सर्व आधार केंद्र चालक व महा ई-सेवा केंद्र चालकांची जिल्हाधिकारी कार्यालयात बैठक झाली. यात आधार नोंदणीचा उपजिल्हाधिकारी तथा आधारचे नोडल अधिकारी अरुण आनंदकर यांनी आढावा घेतला. नगर जिल्ह्यात २०११ च्या लोकसंख्येनुसार १०२ टक्के आधार नोंदणी झाली आहे. देशात कुठेही आधार नोंदणी करता येते. त्यामुळे लोकसंख्येच्या तुलनेत आधार नोंदणी जास्त झालेली आहे. जिल्ह्यात २०११ नुसार ४५ लाख ४३ हजार १५९ लोकसंख्या असून, ४६ लाख ४८ हजार ७१८ जणांची आधार नोंदणी झाली आहे. तर अंगणवाडीमधील बालकांची ९१ टक्के आधार नोंदणी झाली आहे. जिल्ह्यात ५ हजार ५५ अंगणवाड्या असून, या अंगणवाड्यात ३ लाख ४६ हजार ५५३ मुले येतात. त्यापैकी ३ लाख १५ हजार मुलांची आधार नोंदणी झाली आहे. अंगणवाड्यातील अजूनही तीस हजार मुले आधारविना आहेत. शाळेतील मुलांची आधार नोंदणी ९७ टक्के झाली आहे.

जिल्ह्यात ९ लाख ३७ हजार ९९० शालीय विद्यार्थी असून, त्यातील ९ लाख १२ हजार ८७७ विद्यार्थ्यांची आधार नोंदणी झाली आहे. नागरिकांसाठी ८७ आधार नोंदणी केंद्र सुरू आहेत.