मुलांची जन्मतःच होणार आधार नोंदणी

म.टा.प्रतिनिधी,नगर

राज्यातील सर्व खासगी व सरकारी दवाखान्यांत जन्मणाऱ्या बालकांचीही आधार नोंदणी करण्याचा निर्णय घेण्यात आला आहे. त्यानुसार नवजात बालकांची जन्म नोंदणी करतानाच आधार प्रणालीतही नोंद करण्याचे आदेश सार्वजनिक आरोग्य विभागाने दिले आहेत. या निर्णयामुळे बालक जन्मल्यानंतर लगेच आधारसाठी स्वतंत्रपणे नोंदणी करण्याचा मार्ग मोकळा झाला आहे.

राज्यात सद्यस्थितीत पाच वर्षांखालील बालकांच्या आधार नोंदणीमध्ये बोटांचे ठसे व डोळ्यांची प्रतिमा यांची नोंद घेतली जात नाही. त्याऐवजी या मुलांचे आधार नंबर त्यांच्या पालकांच्या आधारशी लिंक केले जातात. यामध्ये मुलाचे नाव, जन्म दिनांक याबाबत माहिती देणे बंधनकारक आहे. या परिस्थितीचा विचार करण्यात येऊन हा निर्णय घेण्यात आला आहे. राज्यातील खाजगी व सराकारी या दोन्ही प्रकारच्या दवाखान्यात बालकाचा जन्म झाल्यास दवाखान्यातील ऑपरेटरकडून आधार प्रणालीत नोंद घेतली जाणार आहे. नवजात बालकाचे नाव निश्चित झालेले नसल्यास अशा बालकांची नोंदणी विना नावे करावी. त्यानुसार आईचे नाव नोंदवल्यानंतर सदर बालक त्यांच्या पालकांचे कितवे अपत्य आहे हे विचारात घेऊन त्या क्रमांकाचे मूल अशी नोंद आधारमध्ये करण्याच्या सूचना आरोग्य विभागाने दिल्या आहेत. दरम्यान, दवाखान्यातील एखाद्या बालकाची विना नावे नोंदणी आधारमध्ये झाली असेल तर अशा बालकाचे नाव निश्चित झाल्यानंतर नोंद अपडेट करण्याची सुविधा उपलब्ध करुन देण्यात आली आहे. यासाठी uidai.gov.in या वेबसाइटवर जाऊन माहिती अपलोड करता येऊ शकते.

आधार नोंदणी रखडली!

जिल्ह्यातील अंगणवाड्यांतील सहा वर्षांपर्यंतच्या मुलांची आधार नोंदणी करण्याचे काम सध्या सुरू असून यामध्ये अडचणी वाढल्या आहेत. आधार नोंदणीसाठी पुरेसे मशीन उपलब्ध नसल्यामुळे आधार नोंदणीचे काम रखडले आहे. मशीन उपलब्ध करुन देण्यासाठी पाठपुरावा केला जात असला तरी त्यास प्रतिसाद मिळालेला नाही. ग्रामपंचायतीत आधार नोंदणी केली जात असल्यामुळे अंगणवाड्यांतील मुलांना येथे घेऊन यावे लागत आहे. त्यामुळे दोन वर्षे झाली तरीही अंगणवाड्यांतील आधार नोंदणी पूर्ण झालेली नाही.