नगर शहरात एक हजारहून अधिक जणांविरुध्द गुन्हे
म. टा. प्रतिनिधी, नगर
नगर शहरातील अपघातांचे प्रमाण कमी करण्यासाठी मद्यपान करून वाहने चालविणाऱ्या वाहनचालकांवर पोलिसांकडून कारवाई करण्यात येत आहे. गेल्या सात महिन्यांत एक हजारहून अधिक वाहनचालकांविरुद्ध शहरातील तीन पोलिस स्टेशनला गुन्हे नोंदविण्यात आले आहेत. या वाहनचालकांना थेट न्यायालयात हजर करून दंड वसूल केला जातो.
राज्याच्या रस्ता सुरक्षा समितीच्या बैठकीनुसार अपघातांचे प्रमाण दहा टक्क्यांनी कमी करण्यासाठी उपाययोजना राबविण्यात येत आहेत. नगर शहरात रस्ते अपघातांच्या प्रमाणात वाढ झाली आहे. हे अपघातांचे प्रमाण कमी करण्यासाठी पोलिसांकडून प्रयत्न करण्यात येत आहेत. त्यात नगर शहरात महामार्गावर, अंतर्गत रस्त्यांवर ठिकठिकाणी अचानक नाकाबंदी करून वाहन चालविणाऱ्यांची ब्रेथ अॅनालायझर उपकरणाद्वारे तपासणी करण्यात येत आहे. गेल्या सात महिन्यांत १ हजार ५ मद्यपी वाहनचालकांविरुद्ध गुन्हे नोंदविण्यात आले आहेत. यात सर्वाधिक ४९४ गुन्हे कोतवाली पोलिस स्टेशनला नोंदविण्यात आले आहेत. तोफखाना पोलिस स्टेशनला ३१४, भिंगार कॅम्प पोलिस स्टेशनला १९७ गुन्हे नोंदविण्यात आले आहे. पोलिस प्रशासनाकडून उपलब्ध झालेल्या आकडेवारीनुसार दररोज पाच मद्यपी वाहनचालकांविरुद्ध गुन्हे नोंदविण्यात आले आहे. कारवाईमध्ये दारू पिऊन चारचाकी, दुचाकी वाहने चालविणाऱ्यांचा समावेश आहे. मद्यपींकडून दोन हजार रुपये दंड न्यायालयाकडून वसूल केला जात आहे.
कोट
नगर शहरामध्ये अनेक वाहनचालक मद्यपान करून वाहने चालवितात हे दाखल गुन्ह्यांवरून दिसून येत आहे. त्यातून शहरात अपघात होत आहेत. वाहनचालक व अन्य व्यक्तींच्या जीविताला धोका निर्माण केला जात आहे. त्यामुळे शहरात वाहतुकीचे नियमांचे उल्लंघन करणाऱ्या वाहनधारकांवर कठोर कारवाई करण्यात येत आहे.
संदीप मिटके, पोलिस उपअधीक्षक, नगर शहर
मद्यपींवर दाखल झालेले गुन्हे
पोलिस स्टेशन गुन्हे
कोतवाली ४९४
तोफखाना ३१४
भिंगार १९७