पोस्टासमोर डाकसेवकांची निदर्शने

म. टा. प्रतिनिधी, नगर

कामगार कायद्यानुसार ग्रामीण डाकसेवकांना सानुग्रह अनुदानाचा फरक मिळण्याच्या प्रमुख मागणीसह इतर मागण्यांसाठी अखिल भारतीय ग्रामीण डाकसेवक संघटनेने शहरातील पोस्टाच्या मुख्य कार्यालयासमोर निदर्शने केली. या आंदोलनात संघटनेचे कार्याध्यक्ष जी. टी. राजगुरू, सचिव एन. बी. जहागीरदार, एल. एम. बर्डे, सुनील शिंदे, गौतम मने, आजिनाथ जोशी, बाळासाहेब जगदाळे, रेवनाथ काकडे, प्रदीप वराडे, राजेंद्र गवते, अशोक बंडगर, नरेंद्र माळी, भीमराव गिरमकर, सलीम शेख, विजय एरंडे, संजय लंके आदी सहभागी झाले.

सर्व कामगारांना एकच कायदा लागू असताना पोस्ट खात्याकडून मात्र डाकसेवकांना भेदभावाची वागणूक दिली जात आहे. कर्मचाऱ्यांना मागील आर्थिक वर्षाचा सानुग्रह अनुदानाचा सात हजार रुपयांचा फरक तत्काळ देण्यात यावा, तसेच डाकसेवकांना सातवा वेतन आयोग लागू करण्याची मागणी आंदोलकांनी केली. मागणी मान्य न झाल्यास १४ ऑक्टोबरला दिल्लीतील डाकभवनासमोर धरणे आंदोलन करण्याचा इशारा देण्यात आला. २५ व २६ ऑक्टोबरला दोन दिवसांचा देशव्यापी संप पुकारण्यात आल्याचे सांगण्यात आले. या निदर्शनात ग्रामीण डाकसेवक मोठ्या संख्येने सहभागी झाले होते.