जुलै महिन्यात कृषी जागृती सप्ताह

म. टा. प्रतिनिधी, नगर

केंद्र व राज्य सरकारच्या विविध कृषी योजनांची माहिती शेतकऱ्यांपर्यंत पोहोचविण्यासाठी राज्यभरात १ ते ७ जुलै या काळात कृषी जागृती सप्ताह उपक्रम राबविण्याचा निर्णय राज्य सरकारने घेतला आहे. या उपक्रमात कृषी विभागाच्या विविध योजना, कृषी विद्यापीठे, केंद्रीय संशोधन संस्था यांनी संशोधित केलेले अत्याधुनिक कृषी तंत्रज्ञान शेतकऱ्यांपर्यंत पोहोचविण्यासाठी प्रयत्न केले जाणार आहेत.

कृषी जागृती सप्ताह प्रत्येक गावात राबविला जाणार असल्याने त्यासाठी तालुका व जिल्हास्तरावर योग्य नियोजन करावे लागणार असून या नियोजनासाठी जिल्हाधिकाऱ्यांच्या अध्यक्षतेखाली कृषी अधिकाऱ्यांची बैठक घेण्याच्या सूचना दिल्या आहेत. नियोजन व अंमलबजावणीमध्ये कृषी विद्यापीठे, विद्यापीठांतर्गत येणारी संशोधन केंद्रे, कृषी महाविद्यालये, साखर कारखाने, कृषी उत्पन्न बाजार समित्या, राष्ट्रीयीकृत व सहकारी बँका यांचाही सहभाग घेण्यासाठी प्रयत्न करण्याच्या सूचना आहेत. गावपातळीवर गावातील शेतकरी मित्र, शेतकरी गटांचे प्रतिनिधी आणि शेतकरी उत्पादक कंपन्यांचा सहभाग घेतला जाणार आहे. गावातील सरपंच, ग्रामपंचायत सदस्यांनाही सहभागी करून घेतले जाणार आहे. या सप्ताहासाठी स्वतंत्र निधीची तरतूद करण्यात येणार नाही.