काळाचा घाला, खड्डे बुजवण्याचे काम करणार्‍या मजुरांना कंटेनरने चिरडले

अहमदनगर : नगर ते औरंगाबाद महामार्गावर खड्डे बुजवण्याचे काम करत असलेल्या मजुरांना भरधाव वेगाने आलेल्या कंटेनरने चिरडले. पुढे याच कंटेनरने उभ्या टिपरलाही धडक दिली. या अपघातात दोन मजूर आणि कंटेनर चालक असे तिघे ठार झाले.

नेवासा तालुक्यातील कांगोणी शिवारात हा अपघात झाला. रमेश भगवान माने ( रा बाभुळखेडे ता नेवासे), ऋषिकेश संजय निकम (रा सलाबतपुर ता नेवासे ) व कंटेनर चालक दादा खराडे (रा. सातारा) हे तिघे ठार झाले. तर महेबुब शेख, संभाजी वायकर (रा बाभुळखेडे ता. नेवासे) दोघे गंभीर जखमी झाले. कंटेनर भरधाव वेगाने नगरकडे जात असताना खड्डे बुजवण्यासाठी साहित्य घेऊन उभ्या असलेल्या टिपरला धडकला. तसाच पुढे दुभाजकावर आदळला. त्यावेळी महामार्गावर खड्डे बुजवण्याचे काम करत असलेल्या मजुरांनाही कंटेनरने चिरडले. जखमी मजुरांना नेवासे फाट्यावरच्या खासगी रुग्णालयात हलविण्यात आले. तेथे डॉ. अविनाश काळे यांनी आधी दोघांना मृत घोषित केले. कंटेनर चालक खराडे हा गंभीर जखमी झाला होता. नंतर त्याचाही मृत्यू झाला.

शिर्डीत साई मंदिराच्या गेटवर तुफान राडा; हार, फुलं विक्रेत्यांची घोषणाबाजी, सुरक्षा रक्षकांशी झटापट

शनिअमावस्या असल्याने या मार्गावर दुचाकी चारचाकी वाहनांची वर्दळ होती. अपघात घडल्यानंतर दुचाकीवरील काही शनिभक्त तरुणांनी जखमींना मदत केली. कंटेनर चालक अडकला होता. त्याला बाहेर काढून रुग्णवाहिकेत ठेवले. खड्डे बुजवण्याचे काम नगरच्या ठेकेदाराने घेतले असले तरी सर्व मजूर नेवासे तालुक्यातीलच होते. अपघातानंतर काही काळ खोळंबलेली वाहतूक तरुणांच्या मदतीने सुरळीत करण्यात आली.

शिर्डी प्रकरणी बैठक सुरू असतानाच विखेंना थेट शहा, एकनाथ शिंदेंचा फोन; काय सांगितले?