कोविड काळातील कामगिरीसाठी नगरमधील रुग्णालयाची ब्रिटनमध्ये 'वर्ल्ड बुक ऑफ रेकार्ड्स'मध्ये नोंद

अहमदनगर: कोविड काळात उत्कृष्ट वैद्यकीय सेवा दिल्याबद्दल वर्ल्ड बुक ऑफ रेकॉर्डतर्फे नगरमधील साईदीप हॉस्पिटलचे डॉ. दीपक यांचा लंडनमध्ये ब्रिटिश पार्लियामेंटमध्ये प्रमाणपत्र देऊन गौरव करण्यात आला. यानिमित्त साईदीप हॉस्पिटल आणि हेल्थ केअर ट्रस्ट यांच्या वतीने त्यांचा सत्कार करण्यात आला. यावेळी बोलताना डॉ. दीपक पुढे म्हणाले की, वैद्यकीय शिक्षण पूर्ण करुन नगरमध्ये आल्यानंतर मला माझे स्वतःचे हॉस्पिटल ज्यामध्ये सर्व वैद्यकीय सुविधा उपलब्ध करून देता येतील असे नेहमी वाटत होते. ते एक स्वप्न मी पहिले आणि ते साकार करण्यासाठी जिद्द उराशी बाळगून मी सतत वैद्यकीय क्षेत्रात नाविन्यपूर्ण सुविधा, ज्यामुळे अचूक निदान करता येऊ शकते आणि रुग्णास योग्य ते उपचार उपलब्ध करता येऊ शकतात हे ध्येय ठेवले.

प्रचंड मेहनतीने दीपक हॉस्पिटल सुरु केले. पण, मन मान्य करत नव्हते. दीपक हॉस्पिटलमध्ये जागा कमी पडू लागली मग माझे मित्र सहकारी संचालक यांच्याकडे साईदीप बाबत विषय मांडला. ज्यामध्ये आम्ही सर्व ३० वर्षांपेक्षा जास्त प्रॅक्टिस करणारे डॉक्टर्स आणि आमची डॉक्टर्स मुले सर्वजण एकाच छताखाली वैद्यकीय सेवा देऊ शकतील, म्हणून १३ मजली इमारतीमध्ये साईदीपची निर्मिती करु. अखेर १३ मजले असलेली परिपूर्ण हॉस्पिटल निर्माण करता आले आणि गेली ३ वर्षापेक्षा जास्त काळ हे हॉस्पिटल लोकांच्या हृदयात बसले असून सर्व तपासण्या, योग्य उपचार आणि समाधानी रुग्ण आणखीन काय पाहिजे.

कार्यक्रमाचे प्रास्ताविक बालरोग तज्ञ डॉ. अनिलकुमार कुऱ्हाडे यांनी केले. जेष्ठ संचालक डॉ. आर.आर.धूत, डॉ. रविन्द्र सोमाणी, डॉ. कैलाश झालानी, डॉ. विकास लबडे यांनी जुन्या आठवणीना उजाळा दिला. साईदीप हॉस्पिटलतर्फे जेष्ठ संचालक डॉ. श्यामसुंदर केकडे व विलास काळभोर यांनी डॉ. दीपक यांचा व डॉ. सीमा शेख यानी सौ. ज्योति दीपक यांचा सत्कार केला. कार्यक्रमाचे सूत्रसंचालन ड़ॉ.पायल धूत यानी केले व आभार डॉ. व्ही.एन. देशपांडे यांनी मानले. या वेळी साईदीप हॉस्पिटलचे संचालक डॉ. इक्बाल शेख, डॉ. शिरीष कुलकर्णी, डॉ. रोहित धूत, डॉ. साहिल शेख, डॉ. साहिल कुलकर्णी, डॉ. भूषण खर्चे, डॉ . गणेश सारडा, डॉ. मेहवाश साहिल शेख, साईदीप हेल्थ केयर ट्रस्टच्या अध्यक्षा नंदा सोमाणी, रोहिणी कुर्हाडे, शोभा धूत, अनिता झालानी, सुनीता देशपांडे,इशिता झालानी, साईदीप हॉस्पिटलचे सर्व डॉक्टर्स, प्रशासन विभागातील सर्व अधिकारी, सर्व कर्मचारी मोठ्या संख्येने उपस्थित होते.