शिवसेनेबद्दल राष्ट्रवादीनं दिलेल्या 'या' प्रतिक्रियेचा अर्थ काय?; चर्चेला उधाण

अहमदनगर: महापालिकेच्या स्थायी समिती सभापतीपदाच्या निवडीवरून राजकीय वर्तुळात सुरू झालेली चर्चा शमण्याची चिन्हे दिसत नाहीत. आज सभापतीपदाचा पदभार नगरसेवक मनोज कोतकर यांनी स्वीकारला असला तरी यावेळी महाविकास आघाडीतील प्रमुख पक्ष असणाऱ्या शिवसेना व काँग्रेसचे नगरसेवक अनुपस्थित होते. यावर करोनाचा काळ सुरूय, गर्दी नको, अशी सारवासारव महापालिकेतील राष्ट्रवादीचे गटनेते तथा विरोधी पक्षनेते संपत बारस्कर यांनी केली आहे.

वाचा: मास्क न घालणारे किलर; मुंबईच्या महापौर भडकल्या

महापालिकेच्या स्थायी समितीच्या सभापतीपदी भाजपमधून राष्ट्रवादीमध्ये प्रवेश केलेले नगरसेवक मनोज कोतकर यांची निवड झाली आहे. कोतकर यांच्या विरोधात शिवसेनेचे नगरसेवक योगीराज गाडे यांनी अर्ज भरला होता. मात्र हा अर्ज नंतर मागे घेण्यात आल्याने कोतकर यांची सभापतीपदी बिनविरोध निवड झाली. त्यातच 'शिवसेना नगर' या फेसबुक पेजवर सभापती निवडणुकीबाबत टीका करणाऱ्या पोस्ट करण्यात आल्या होत्या. तर, आज कोतकर यांनी सभापती पदाचा पदभार स्वीकारताना शिवसेनेचे नगरसेवक, पदाधिकारी अनुपस्थित होते. आज महापालिकेचे विरोधी पक्षनेते संपत बारस्कर, नगरसेवक कुमार वाकळे आदींच्या उपस्थितीमध्ये कोतकर यांनी सभापती पदाचा पदभार स्वीकारला.
वाचा: रोहित पवारांनी कार्यकर्त्यांकडून मागितलं 'हे' बर्थ-डे गिफ्ट

यावेळी महाविकास आघाडीतील घटक पक्ष असणारा शिवसेना व काँग्रेस यांचे नगरसेवक अनुपस्थित असून शिवसेनेत नाराजी आहे का? असे विचारले असता गटनेते बारस्कर म्हणाले, 'शिवसेनेत कुठल्याही प्रकारची नाराजी नाही. हे राष्ट्रवादी काँग्रेसचे सभापती आहेत. आता तर आमचे मिळते-जुळते होत आहे. सध्या करोना काळ सुरू आहे. करोनाच्या काळात सोशल डिस्टंसिंगचे पालन व्हावे, यासाठी जास्त गर्दी न करण्याच्या हिशोबाने कमी लोक बोलावून सभापतींनी पदभार स्वीकारला. शिवसेना, काँग्रेसमध्ये शहरात मोठ्या प्रमाणात नेते, नगरसेवक, कार्यकर्ते आहेत. इतके लोक आले तर गर्दी होईल व त्यामुळे करोनाचा प्रादुर्भाव होऊ नये, यासाठी सभापती कोतकर यांनी हा निर्णय घेतला. आम्ही त्याचे स्वागत करतो. दरम्यान, यावेळी शिवसेनेला आमंत्रण दिले नव्हते का ? असे विचारले असता सभापती यांनी आमंत्रण कोणाला दिले हे तुम्ही त्यांना विचारा, असेही बारस्कर म्हणाले .

वाचा: गुप्तेश्वर पांडे जेडीयूमध्ये; काँग्रेसचा फडणवीसांना 'हा' सल्ला