मुलगी आत्महत्येचा प्रयत्न करायची म्हणून मांत्रिकाकडे घेऊन गेले आणि…

विजयसिंह होलम । अहमदनगर

महाराष्ट्र टाइम्स.कॉम

नगर शहरातील वैदुवाडी भागात एक पंधरा वर्षांची मुलगी सतत फाशी घेऊन आत्महत्या करण्याचा प्रयत्न करायची. त्यामुळे लोकांच्या सांगण्यावरून तिची आई तिला एका मांत्रिकाकडे घेऊन गेली. त्याने मुलीच्या अंगात फाशी घेऊन आत्महत्या केलेल्या महिलेचे भूत संचारल्याचे सांगितले. ते बाहेर काढण्यासाठी होमहवन करावे लागेल या कारणासाठी आठ हजार रुपये आणि अन्य साहित्य घेतले. शेवटी आपली फसवणूक झाल्याचे लक्षात आल्यावर मुलीने पोलिसांकडे फिर्याद दिली. तोफखाना पोलिसांनी मांत्रिकासह तिघांविरुद्ध गुन्हा दाखल केला आहे.

या मांत्रिकाने होम हवन करून मुलीच्या अंगातील भूत काढून देतो, असे सांगून त्यांच्याकडून पैसे उकळले. होमहवन आणि अन्य साहित्य व विधीसाठी पैसे घेतले. फसवणूक झाल्यावर मुलीच्या आईने व मुलीने पैसे परत देण्याची मागणी केली. मात्र आरोपींनी नकार दिला, उलट त्यांनाच मारहाण केली. त्यामुळे पंधरा वर्षीय मुलीच्या फिर्यादीवरून अविनाश धनगर, आरती अविनाश धनगर (रा. वैदूवाडी, भिस्तबाग चौक) व एक अनोळखी पुरुष (मांत्रिक) यांच्याविरुद्ध जादूटोणा विरोधी कायद्यानुसार गुन्हा दाखल करण्यात आला आहे.

वाचा: त्र्यंबकेश्वरमध्ये पुरोहितांच्या दोन गटांत तुंबळ हाणामारी; गावठी कट्टा, काडतुसे जप्त

आपली मुलगी सतत गळफास लावून घेत आत्महत्या करण्याचा प्रयत्न करते म्हणून आई तिला घेऊन या मांत्रिकाकडे गेली होती. मांत्रिकाने मुलीला भूतबाधा झाल्याचे सांगितले. फाशी घेऊन आत्महत्या केलेल्या एका मुलीचे भूत तिच्या अंगात संचारले आहे. ते बाहेर काढण्यासाठी तोडगा करण्यास सांगितले. त्यामुसार होम हवन करण्यात आले. कोंबडी कापण्यात आली, मांत्रिकाने पैसेही घेतले. आता मुलीच्या अंगातील भूत नाहीसे झाल्याचे त्याने सांगितले.

वाचा: पुणे पुन्हा हादरले! बर्थ-डे पार्टीला बोलावून २२ वर्षीय तरुणीवर बलात्कार

त्यानंतर मात्र, आपली फसवणूक झाल्याचे मुलगी आणि तिच्या आईच्या लक्षात आले. त्यामुळे त्यांनी पुन्हा मांत्रिक आणि साथिदारांकडे जाऊन पैसे परत देण्याची मागणी केली. तेव्हा या आरोपींनी पैसे तर परत दिले नाहीतच, उलट त्यांनाच मारहाण केली. त्यामुळे त्या दोघींना पोलिस ठाणे गाठून फिर्याद दिली. पोलिसांनी गुन्हा दाखल केला आहे. पोलिस निरीक्षक ज्योती गडकरी यांचे पथक तपास करीत आहे.