'करोना' संशयितांची नावं फोडणाऱ्या मनसे उपाध्यक्षावर गुन्हा

अहमदनगर: सिव्हिल हॉस्पिटलमधून निघून गेलेल्या संशयित करोना रुग्णांच्या नावाचे सिव्हिल हॉस्पिटलचे प्रशासकीय पत्र सोशल मीडियावर व्हायरल झाले होते. हे पत्र महाराष्ट्र नवनिर्माण सेनेचे उपाध्यक्ष संजीव पाखरे (रा. पुणे) यांनी व्हायरल केल्याचे समोर आले आहे. त्यांच्याविरुद्ध जिल्हाधिकाऱ्यांच्या आदेशाचे उल्लंघन केल्याचा गुन्हा दाखल करण्यात आला आहे.

Live: राज्यातील करोनाग्रस्तांचा आकडा ४५ वर

सिव्हिल हॉस्पिटलचा कर्मचारी कैलास काशिनाथ शिंदे याने या संदर्भात फिर्याद दिली आहे. करोनाचे संशयित रुग्ण म्हणून तिघांना सिव्हिल हॉस्पिटलमधील विलगीकरण कक्षात ठेवण्यात आले होते. हे तिघे हॉस्पिटलमधून निघून गेले होते. त्यांचा शोध घेण्याबाबातचे पत्र सिव्हिल प्रशासनाने रुग्णांच्या नावासह दिले होते. त्याचवेळी तिघेही परत सिव्हिलमध्ये दाखल झाले होते. परंतु त्यांच्या नावाचे पत्र सोशल मीडियावर व्हायरल करून तिघांची नावे उघड करण्यात आली होती.

Live: करोना व्हायरसच्या फैलावामुळं मुंबई सतर्क

या प्रकरणाची चौकशी करण्याचे आदेश जिल्हाधिकारी राहुल द्विवेदी यांनी पोलीस प्रशासनाला दिले होते. सायबर पोलिसांनी केलेल्या तांत्रिक तपासात मनसेचे पुण्यातील संजीव पाखरे यांनी हे नावे व्हायरल केल्याचे समोर आले. त्यानुसार पाखरे यांच्याविरुद्ध बुधवारी रात्री आपत्कालीन व्यवस्थापन कायद्यान्वये गुन्हा नोंदविण्यात आला आहे. जिल्हाधिकारी तथा अध्यक्ष जिल्हा आपत्कालीन व्यवस्थापन यांनी काढलेल्या आदेशाचे उल्लंघन केल्याचा ठपका पाखरेंवर ठेवण्यात आला आहे. पाखरे हे राज ठाकरे यांनी नुकतेच जाहीर केलेल्या मनसेच्या शॅडो कॅबिनेटमध्ये आहेत.

वाचा: निमलष्करी दले 'युद्ध सज्ज'; जवानांच्या रजा रद्द

वाचा: नोटाही असू शकतात करोना संसर्गाचे माध्यम