...आणि रोहित पवारांनी स्वत: हातात काठी घेतली!

अहमदनगर: कर्जत आणि विशेषत: करमाळा तालुक्यात धुमाकूळ घालणाऱ्या बिबट्याला ठार मारण्याचा आदेश झाला असला तरी पोलिस आणि वन अधिकऱ्यांना तो सापडत नाही. उलट त्याचे हल्ले सुरूच असल्याने ग्रामस्थांमध्ये प्रचंड भीतीचे वातावरण आहे. त्यांना दिलासा देण्यासाठी गेलेले राष्ट्रवादी काँग्रेसचे आमदार रोहित पवार यांनी हातात काठी घेऊन वन अधिकाऱ्यांसोबत काही काळ शोध मोहीमेत भाग घेतला. रात्रीही बिबट्या हाती लागला नसला तरी पवारांनी संवाद साधत ग्रामस्थांना दिलासा देण्याचा प्रयत्न केला.

वाचा: ...तर आम्ही शांत बसणार नाही; रोहित पवारांचा दानवेंना कडक इशारा

सोलापूर जिल्ह्यातील करमाळा आणि नगर जिल्ह्यातील कर्जत तालुक्याच्या सीमा भागातील गावांत गेल्या काही दिवसांपासून या बिबट्याचा उपद्रव सुरू आहे. आतापर्यंत त्या भागातील तीन जणांचे बळी गेले आहेत. अनेक जखमी झाले असून काहींचा थोडक्यात बचावही झाला आहे. यामुळे निर्माण झालेली घबराट लक्षात घेऊन वनविभागाने या बिबट्याला ठार मारण्याचा आदेश दिला आहे. त्यानुसार वनविभागाचे अधिकारी बंदुका घेऊन फिरत आहेत. मात्र, बिबट्या अद्याप त्यांच्या हाती लागला नाही. अनेक वेळा तो गुंगारा देत पळून गेला आहे. कधी तो उसाच्या शेतात असल्याचे तर कधी कोणावर हल्ला केल्याची माहिती येते, त्यावर वनविभागाचे कर्मचारी तेथे धाव घेतात, मात्र तो निघून गेलेला असतो.

वाचा: तृप्ती देसाई यांच्या गनिमी काव्याला उत्तर देण्यासाठी शिर्डीकरांनी केलीय 'अशी' तयारी

रात्रीही ग्रामस्थ आणि वनअधिकारी फिरत असतात. आमदार पवार कर्जत तालुक्याच्या दौऱ्यावर आले होते. तेव्हा शेजारच्या तालुक्यातील हल्ल्याची एक घटना ताजी असल्याने पवार यांनी तेथे धाव घेतली. कर्जत तालुक्यातील ग्रामस्थांसोबतच करमाळा तालुक्यातील ग्रामस्थांशीही संवाद साधत त्यांना धीर दिला. रात्रीच्या गस्तीवरील वन विभागाच्या अधिकाऱ्यांशीही त्यांनी संवाद साधून मोहिमेची माहिती घेतली. या कामात त्यांना प्रोत्साहन देण्याचा एक भाग म्हणून आमदार पवार यांनी स्वत: हातात काठी घेतली आणि वन विभागाच्या पथकात काही काळ गस्तीत सहभाग नोंदविला. करमाळा तालुक्यातील वांगी, सांगवी येथे जाऊन त्यांनी ग्रामस्थांशीही संवाद साधला. काहीही करून बिबट्याला तातडीने पकडावे किंवा मारावे व आमची या संकटात सुटका करावी, अशी मागणी दोन्ही तालुक्यांतील ग्रामस्थांनी पवार यांच्याकडे केली.

वाचा: आम्हाला माफ कर; पुण्यात झळकले रानगव्याची माफी मागणारे पोस्टर