वाघीण जेव्हा पिल्लांना मागे ठेवून जाते...

अहमदनगर: ‘तिने’ पिल्लांना जन्म देऊन पंधरा दिवस उलटून गेले. वनविभागाचे अधिकारी सांगत होते की, पंधरा दिवसांत ‘ती’ पल्लांना घेऊन तेथून निघून जाईल. दोन-तीन दिवस ‘तिचे’ दर्शनही झाले नाही. त्यामुळे ती आता येथून गेली असावी, असाच समज वीज प्रकल्पातील कर्मचाऱ्यांचा झाला. मात्र, रविवारी दुपारी वीज प्रकल्पाच्या उंच गेटवरून उडी मारताना तिला जाताना पाहून सर्वांनाच पुन्हा धडकी भरली. शिवाय ती एकटीच गेली, पिल्ले आताच असल्याने ती पुन्हा येईल, याची भीतीही कायम आहे.

अकोले तालुक्यात भंडारदरा परिसरातील कोदणी वीज प्रकल्पात हा थरार सुरू आहे. तेथे एका बिबट्याच्या मादीने पिल्लांना जन्म दिला आहे. या बंद वीज केंद्रात बिबट्याचे दर्शन झाल्याने तेथील कर्मचाऱ्यांमध्ये भितीचे वातावरण आहे. रात्रपाळी करताना तर कर्मचारी जीव मुठीत घेऊन काम करीत आहेत.

Live: महाराष्ट्रातील सर्व ठळक घडामोडी एकाच क्लिकवर

या बिबट्याच्या मादीला पकडण्यासाठी वनविभागाने पिंजरा लावला. आमिष म्हणून तेथे एक शेळी बांधण्यात आली. मात्र ही मादी त्याला बळी पडली नाही. वीज केंद्रातील तिच्या पिल्लांच्या संगोपनात ती व्यस्त आहे. स्वत: अधून मधून बाहेर जंगलात जाऊन येते. पंधरा दिवसांनी ती पिल्लांना तेथून घेऊन जाईल, त्यामुळे गेट उघडेच ठेवा, असा सल्ला वन अधिकाऱ्यांनी दिला होता. त्यानुसार गेट उघडे ठेवण्यात आले. पंधरा दिवस होऊन गेले. शिवाय मधल्या काळात ती दिसली नाही. त्यामुळे ती गेली असे समजून पुन्हा गेट बंद करण्यास सुरवात झाली.

वाचा: रोहित पवारांनी दाखवली मोदी सरकारची 'ही' चूक

रविवारी दुपारी गेट बंदच होते. तेथील सुरक्षारक्षक बी. एन. मोरे चहा पिण्यासाठी थोडावेळ बाजूला गेले होते. त्या काळात ही मादी उंच गेटवरून उडी मारून जाताना दिसली. कंट्रोल कॅबिनमधील वसंत आरोटे यांनी सीसीटीव्हीमध्ये हे दृष्य पाहिले. त्यांनी तातडीने इतर सहकारी आणि वनविभागाच्या अधिकाऱ्यांना याची माहिती दिली. जाताना ती एकटीच गेली. म्हणजे तिची पिल्ले अद्याप आतमध्येच असावीत. त्यांच्यासाठी ती पुन्हा येऊ शकते. त्यामुळे आता पुन्हा एकदा तिला पकडण्यासाठी हाचचाली सुरू झाल्या आहेत.

सुशांत प्रकरण: भाजप नेत्याचे शहांना पत्र, मंत्र्याचे नाव सांगण्याची तयारी

वीज केंद्रातच तिची प्रसूती झाली. चार पिल्लांना जन्म दिला. मोठ्या कष्टाने ती पिल्लांचे संगोपन करीत असल्याचे वीज कर्मचारी अनुभवत होते. शिवाय ती पंधरा दिवसांत पिल्लांना घेऊन निघून जाईल, असे वन विभागाचे अधिकारी सांगत होते. त्यामुळे वीज कर्मचारी तिच्या ‘डिस्चार्ज’ची प्रतीक्षा करीत होते. आता मात्र, ती कायमची गेलेली नाही, जात नाही हे स्पष्ट झाल्यावर पुन्हा घबराट निर्माण झाली आहे. सहानुभूतीची जागा भितीने घेतली असून तिला पकडण्याची मागणी कर्मचारी आणि वसाहतीतील नागरिक करू लागले आहेत.