छिंदमला जामीन मंजूर; पण मुक्काम कारागृहात

म. टा. प्रतिनिधी, नगर

छत्रपती शिवाजी महाराजांबद्दल अपशब्द वापरल्याप्रकरणी व सरकारी कामात अडथळा आणणे या दोन्ही गुन्ह्यांत माजी उपमहापौर श्रीपाद छिंदमला मुख्य न्यायदंडाधिकारी पी. एस. चांदगुडे यांनी शुक्रवारी जामीन मंजूर केला. दोन्ही गुन्ह्यांत प्रत्येकी पंधरा हजार रुपयांच्या जातमुचलक्यावर जामीन मंजूर झाला असला, तरी या जामिनाबाबत शुक्रवारी पूर्तता न झाल्याने त्याची नाशिक कारागृहात रवानगी करण्यात आली. जामिनाबाबत पूर्तता होईपर्यंत त्याचा मुक्काम या कारागृहातच असणार आहे.

धार्मिक भावना दुखावणे, समाजात तेढ निर्माण करणे या गुन्ह्यांत न्यायालयीन कोठडीत असलेल्या छिंदमला दुसऱ्या गुन्ह्यात वर्ग करून नाशिक कारागृहातून गुरुवारी नगरला आणण्यात आले होते. शुक्रवारी सकाळी दहा वाजण्याच्या सुमारास त्याला प्रथमवर्ग न्यायदंडाधिकारी यांच्यासमोर हजर करण्यात आले. त्याला पाच दिवसांची पोलिस कोठडी द्यावी, अशी विनंती पोलिसांनी न्यायालयाकडे केली. न्यायालयाने आरोपीला न्यायालयीन कोठडी दिल्यानंतर छिंदमने स्वतः दोन्ही गुन्ह्यांत जामीन देण्यासाठी न्यायालयात अर्ज करून आपली बाजू मांडली. 'राजकीय द्वेषातून मला अडकविण्यात आले आहे, आई आजारी असते, पत्नी व दोन लहान मुले असून, त्यांची जबाबदारी आहे. त्यामुळे मला जामीन द्यावा,' अशी विनंती छिंदमने न्यायालयाकडे केली. सहायक सरकारी अभियोक्ता क्रांती कुलकर्णी यांनी जामीन अर्जांवर आक्षेप घेऊन आरोपी जामिनावर सुटल्यास कायदा व सुव्यवस्थेचा प्रश्न निर्माण होईल, असा युक्तिवाद केला. दोन्ही बाजूच्या युक्तिवादानंतर छिंदमला दोन्ही गुन्ह्यांत प्रत्येकी पंधरा हजार रुपयांच्या जातमुचलक्यावर न्यायालयाने जामीन मंजूर केला. छिंदमने बाजू मांडल्यानंतर त्याची लगेच नाशिक कारागृहात रवानगी करण्यात आली. त्याच्या वतीने कोणीही जामिनाबाबत शुक्रवारी पूर्तता केलेली नाही. या जामिनाबाबत पूर्तता झाल्यानंतर छिंदम कारागृहाबाहेर येईल. शनिवारी, रविवारी दोन दिवस न्यायालयाला सुट्टी आहे. सुट्टीतील न्यायालयासमोर किंवा सोमवारी याच न्यायालयासमोर जामिनाबाबत पूर्तता होऊ शकते. तोपर्यंत त्याला कारागृहातच राहावे लागणार आहे.

अज्ञातवासात जायचेय, पोलिस बंदोबस्त द्या

जामीन अर्ज दाखल करण्यापूर्वीच छिंदमने नाशिक येथील कारागृह प्रशासनाला पोलिस बंदोबस्तासाठी एक अर्ज दिला आहे. माझ्या जिविताला धोका आहे. जामीन मिळाल्यानंतर अज्ञातवासात जायचे आहे. त्यासाठी पोलिस बंदोबस्त द्यावा, असे अर्जात त्याने म्हटले आहे. हा अर्ज जेल प्रशासनाने पोलिस यंत्रणेकडे दिला आहे. त्या अर्जावर नगरचे पोलिस अधीक्षक निर्णय घेणार आहेत.