नगरच्या महिलांनी केला लिंगाणा सर

म. टा. प्रतिनिधी, नगर

शिवलिंगासारखा दिसणारा व तीन हजार फूट उंचीचा सरळ उभा सुळका असलेला रायगड जिल्ह्यातील लिंगाणा हा अजस्त्र पहाड नगरच्या अहिल्या शिवप्रेमी ट्रेकिंग क्लबच्या १७ ट्रेकर्सने नुकताच सर केला. विशेष म्हणजे या ट्रेकिंग मोहिमेत जिल्ह्यातून पहिल्यादांच सहभागी झालेल्या चार महिलांनीही यश मिळवले.

ट्रेकिंग विश्वात लिंगाणा पहाड आव्हानात्मक मानला जातो. तो सर करण्याचे प्रत्येक गिर्यारोहकाचे स्वप्न असते. हेच लक्ष्य घेऊन नगरच्या अहिल्या शिवप्रेमी ट्रेकिंग क्लबच्या सदस्यांनी लिंगाणा मोहीम आखली होती. नगरहून या मोहिमेत १७ सदस्य सहभागी झाले होते. पुणे, नगर, नाशिक, इंदापूर, मुंबई अशा विविध भागातील हे सदस्य होते. या मोहिमेत प्रथमच सहभागी झालेल्या नगरच्या संजीवनी देशमुख, ऐश्वर्या अहिरे, केंद्रीय विद्यालयामधील क्रीडा शिक्षिका कल्पना शिंदे व नेहा तिवारी या चार महिलांनी ही मोहीम फत्ते केली. लिंगाणा पहाडाच्या माथ्यावर जाण्यासाठी फक्त रोपच्या (दोरी) साहाय्याने चढाई करावी लागते. अनिल वाघ व श्रीरंग राहिंज यांच्या मार्गदर्शनाखाली गोपीनाथ गुंड, संजीवनी देशमुख, संजय देशमुख, प्रमोद अहिरे, अंबादास गाजूल, नेहा तिवारी, शिवाजी जगदाळे, राजेंद्र सोनवणे, विजय शिंदे, अर्णव शिंदे, प्रल्हाद शिंदे,रतन इंगवले, प्रकाश दाभाडे, मृण्मयी शिंदे यांनी ही मोहीम यशस्वी केली.

याबाबत माहिती देताना राहिंज म्हणाले, लिंगाणा हा रायगड गडाचा उपदुर्ग आहे. मानगड, सोन गड, महिंद्र गड, लिंगाणा, कोकण दिवा हे गड रायगडकडे जाणाऱ्या घाट वाटांवर पहारे देतात. कावळ्या, बोचेघल, निसनी, बोराट्या, सिंगापूर, फडताड, शेवत्या, मढे ही येथील घाटाची नावे आहेत. या घाटवाटांवरून सह्याद्रीमार्गे खाली कोकणात उतरता येते. लिंगाच्या आकाराचा हा लिंगाणा गड महाडपासून ईशान्येस सोळा मैलावर असून सह्याद्रीच्या मुख्य रांगेत तोरणा व रायगड यांच्यादरम्यान आहे. याची उंची २९६९ फूट आहे व चढण ४ मैल आहे. तटबंदी पूर्ण नष्ट झाली आहे. या दुर्गावर स्वराज्याच्या शत्रूंना कैदेत ठेवले जात असे. वर अतिअवघड असा वाट नसलेला सुळका आणि घसरडी वाट त्यामुळे येथे कैद्यांना ठेवल्यावर त्यांच्या मनावर या अवघड स्थितीचा परिणाम होऊन कैदी अगदी खचून जात असत व पळून जाण्याचा विचारही त्यांच्या मनात येत नसे, पळण्याचा प्रयन्त केला तर जीव गमवावा लागत असे, असे राहिंज यांनी सांगितले. लिंगाणा गड यशस्वी सर करणाऱ्या नगरच्या चारही महिलांचे उपस्थित गिर्यारोहकांनी कौतुक केले.