अहमदनगरचे नाव ‘श्रीरामनगर’ करा

म. टा. प्रतिनिधी, नगर

अहमदनगर शहराचे नाव बदलून ते ‘श्रीरामनगर’ करण्याची मागणी शिवसेनेसह विश्व हिंदू संघम, शिवप्रतिष्ठान हिंदुस्थान, छत्रपती सेवा संघ, जगदंबा युवा प्रतिष्ठान, हिंदू राष्ट्रसेना, स्वराज्य संस्थापक संघटना आदी हिंदुत्ववादी संघटना तसेच नगर शहर प्राथमिक शिक्षक संघानेही केली आहे. यासंदर्भात महापालिकेत ठराव करून तो शासनास पाठवून त्याच्या मंजुरीसाठी पाठपुरावा केला जाणार असल्याचे शिवसेनेचे शहर प्रमुख दिलीप सातपुते व नगरसेवक योगीराज गाडे यांनी सांगितले.

सातपुते व गाडे यांच्यासह दिलीप पवार, पारूनाथ ढोकळे, संदीप खामकर, आशा निंबाळकर, संगीता ससे, देवीदास मुदगल, अभिषेक भोसले, राजू भगत, वैभव ढगे, संकेत लोकरे, अक्षय शिंदे, प्रकाश कुलट, दीपक बेरड, जनार्दन शेलार, सनी खैरे, मयुर सोनवणे, विशाल कळमकर आदींनी सोमवारी पत्रकार परिषद घेऊन नगरचे नाव श्रीरामनगर करण्याची मागणी केली. श्रीरामचंद्रांच्या वनवासकाळाचा मार्ग नगर शहर व जिल्ह्यातून गेला असून, डोंगरगण व अकोले परिसरात त्याच्या खुणा आहेत, रामायणातही त्याचा उल्लेख आहे. त्यामुळे हा सर्व इतिहास संकलित केला जाणार असून, त्याआधारे या शहराचे नाव बदलण्याची मागणी शासनापर्यंत नेणार असल्याचे या वेळी सांगितले गेले.

दरम्यान, शिवसेनाप्रमुख बाळासाहेब ठाकरे यांनी नगरचे नाव अंबिकानगर करण्याची घोषणा केली होती. शिवसेनेची पूर्वी ती मागणी होती, पण आता श्रीरामनगर केले जावे, अशी भूमिका असल्याचे शहर प्रमुख सातपुते यांनी स्पष्ट केले. तसेच उत्तर प्रदेशचे मुख्यमंत्री योगी आदित्यनाथ यांनी मोगलांचा इतिहास घुसखोरीचा असल्याचे स्पष्ट केल्याचा दाखला गाडे यांनी दिला. नगरचे नाव श्रीरामनगर करण्यासाठी स्वाक्षरी मोहिमेसह विविध मार्गाने पाठपुरावा केला जाणार असल्याचेही त्यांनी सांगितले.