जिल्हा विभाजनाबाबत सर्वपक्षीय बैठक

म. टा. वृत्तसेवा, संगमनेर

नगर जिल्ह्याचे विभाजन व्हावे ही मागणी जोर धरू लागली असून त्यात संगमनेर हे जिल्ह्याचे तर घारगाव हे तालुक्याचे ठिकाण व्हावे यासाठी मंगळवारी (२० फेब्रुवारी) सकाळी १० वाजता घारगाव ग्रामसचिवालय येथे सर्वपक्षीय बैठक आयोजित करण्यात आली आहे.

काही दिवसांपूर्वी पालकमंत्री प्रा. राम शिंदे यांनी नगर जिल्ह्याचे विभाजन होणार, असे स्पष्ट केल्यानंतर महसूलमंत्री चंद्रकांत पाटील यांनीदेखील नगर जिल्हा विभाजनाबाबत सरकार सकारात्मक आहे, तसेच नगर जिल्हा विभाजनाबाबत प्रस्ताव अहवाल मागविण्यात आले आहेत, असे बोलून जिल्हा विभाजनावर एकप्रकारे शिक्कामोर्तबच केले आहे.

त्या पार्श्वभूमीवर घारगाव तालुका झालाच पाहिजे या आपल्या न्यायहक्क मागणीसाठी घारगाव येथे सर्वपक्षीय बैठक बोलाविण्यात आली आहे. काही वर्षांपूर्वीच नगर जिल्हा विभाजनाचा प्रश्न चर्चिला गेला होता. परंतु, आता सर्वांत मोठा जिल्हा म्हणून ओळख असलेल्या नगर जिल्ह्याच्या विभाजनाच्या निर्णयाबाबत सरकार पातळीवर हालचालींना वेग आल्याने सर्व घारगाव ग्रामस्थ तसेच पठार भागातील ४६ गावांतील ग्रामस्थ, सर्वपक्षीय कार्यकर्ते मंगळवारी एकत्र येत आहेत.

पठार भागाच्या भौगोलिक दृष्टीने घारगाव सोयीस्कर आहे, तसेच पठार भागाचा स्वतंत्र तालुका झाल्यास पठार भागाचा विकास झपाट्याने होईल यासाठी पठार भागाचा स्वतंत्र तालुका घारगावच व्हावा यासाठी मंगळवारी पठार भागातील सर्व नागरिकांनी घारगाव ग्रामसाचीवालय येथे एकत्र येण्याचे आवाहन ग्रामस्थांकडून करण्यात आले आहे.