आंदोलनासाठी दिल्लीत जागा सुचवा

म. टा. प्रतिनिधी, नगर

लोकपाल कायद्याच्या अंमलबजावणीच्या मागणीसाठी २३ मार्च २०१८ पासून दिल्लीत आंदोलन करण्यात येणार आहे. यासाठी जागा सुचवावी, अशी मागणी करणारे पत्र ज्येष्ठ समाजसेवक अण्णा हजारे यांनी पंतप्रधान नरेंद्र मोदी यांना लिहिले आहे.

पंतप्रधानांना पाठविलेल्या पत्रात हजारे यांनी लोकपाल विधेयकाचा प्रवास, त्यासंबंधी पक्षांच्या भूमिका, त्यात झालेले बदल याचा आढावा घेतला आहे. सध्याच्या केंद्र सरकारची लोकपाल किंवा लोकायुक्त लागू करण्याची इच्छा नाही. त्यामुळे पुढील वर्षी २३ मार्चपासून दिल्लीत आंदोलन करण्याचा निर्णय घेण्यात आला आहे. त्यासाठी आपणच जागा सूचवावी, असे हजारे यांनी पत्रात म्हटले आहे.

हजारे यांनी म्हटले आहे की, आपण कधीही राजकीय पक्षांविरुद्ध आंदोलन केलेले नाही. मात्र, देशाला कमजोर करणाऱ्या प्रवृत्तीविरुद्ध आमचे आंदोलन आहे. या आंदोलनातही लोकपाल व लोकायुक्त यासंबंधी सध्याच्या केंद्र सरकारची कशी उदासिनता आहे, हे लोकांसमोर आणले जाईल. देशभरातील कार्यकर्त्यांनी २३ मार्च या हुतात्मा स्मृती दिनी दिल्लीत आंदोलन करण्याचे सूचविले आहे. आता हे आंदोलन कोठे करावे, हे आपण सूचवावे, असेही त्यांनी म्हटले आहे.

गुजरातमघ्येही लोकायुक्त नाही

पंतप्रधानांना पाठविलेल्या पत्रात हजारे यांनी गुजरातमध्ये लोकायुक्त नसल्याकडेही लक्ष वेधले. 'तत्कालीन राज्यपालांनी गुजरातमध्ये लोकायुक्तांची नियुक्ती केली होती. त्या वेळी आपल्याच सरकारने प्रथम हायकोर्टात आणि नंतर सुप्रीम कोर्टात धाव घेतली होती. कोर्टाने सरकारविरोधात निर्णय दिला होता. तरीही मागील नऊ वर्षांत गुजरातमध्ये लोकायुक्त नियुक्ती झालेली नाही,'असे त्यांनी म्हटले आहे.