अण्णा हजारे यांनी साधला केजरीवालांवर निशाणा!

मटा ऑनलाइन वृत्त । अहमदनगर

ईव्हीएम मशीनच्या वापरावर राजकीय आरोप प्रत्यारोपाच्या फैरी झडत आहेत. आता ईव्हीएम मशीनच्या वादात ज्येष्ठ समाजसेवक अण्णा हजारे यांनी उडी घेतली असून त्यांनी अरविंद केजरीवाल यांच्यावर निशाणा साधला आहे.

एकीकडे विज्ञान, तंत्रज्ञान प्रगत होत असताना पुन्हा मतपत्रिकेचा (बॅलेट पेपर) आग्रह धरणे चुकीचे असल्याचे अण्णा हजारे यांनी म्हटले. याआधी मतपत्रिकेवर होणाऱ्या मतदानाला अधिक वेळ लागत होता. त्याशिवाय मतमोजणीसाठीही वेळ लागत असल्याचे अण्णा हजारे यांनी म्हटले. ईव्हीएम मशीनऐवजी पुन्हा मतपत्रिकेवर निवडणुका घेणे म्हणजे मागे पाऊल टाकण्यासारखे असल्याचे अण्णा हजारे यांनी सांगितले.

ईव्हीएम मशीनमुळे उमेदवाराला कोणत्या भागातून किती मते मिळाली हे समजून येत असल्याचेही अण्णांनी म्हंटले. त्यामुळे टोटलाइजर मशीनचा वापर करावा अशी मागणी अण्णांनी केली आहे. याबाबत निवडणूक आयोगासोबत पत्रव्यवहार केला असल्याचे त्यांनी म्हटले.

पाच राज्यांतील निवडणुकांच्या निकालानंतर बसपा अध्यक्षा मायावती आणि दिल्लीचे मुख्यमंत्री अरविंद केजरीवाल यांनी ईव्हीएम मशीनवर संताप व्यक्त केला होता. अरविंद केजरीवाल यांनी दिल्ली महापालिकेच्या निवडणुका बॅलेट पेपरवर घेण्याची मागणी दिल्ली निवडणूक आयोगाकडे केली आहे.


Anna Hazare says ballot voting is regressive. #Watch a @TimesNow exclusive pic.twitter.com/TuzqK2ZE26 — TIMES NOW (@TimesNow) March 15, 2017