होळी व रंगोत्सवात सावधानतेचे आवाहन

म. टा. प्रतिनिधी, नगर

होळी, धुळवड आणि रंगपंचमी या सणांचा आनंदोत्सव सावधानतेने साजरा करण्याचे आवाहन महावितरणने केले आहे. होळी पेटवताना वीज तारांच्या खाली ती पेटवू नये तसेच धुळवड वा रंगपंचमी खेळताना घरातील वा बाहेरील वीज उपकरणांवर पाणी पडणार नाही, याची काळजी घेतली जावी, असे महावितरणने सुचवले आहे.

एक मार्चला होळी, दोन मार्चला धुलीवंदन व सहा मार्चला रंगपंचमी असे सण आहेत. होळीच्या दिवशी कौटुंबिक वा सार्वजनिक होळी उत्सव होतात. तर धुलीवंदन व रंगपंचमीला रंगोत्सव रंगतो. पण या आनंद सोहळ्यात संभाव्य वीज अपघात टाळण्यासाठी आवश्यक खबरदारी घेण्याची आवश्यकता महावितरणने मांडली आहे. होळी पेटविताना तसेच रंगांची उधळण करताना वीज वितरण यंत्रणांपासून सावधानता बाळगण्याचे सांगण्यात आले आहे. सभोवताली वीज वाहिन्या किंवा वीज रोहित्र नाहीत याची खात्री करून होळी पेटवण्याचे सांगताना होळीच्या ज्वाळांनी वीजवाहिन्या वितळून जिवंत तार खाली पडून अपघाताचा धोका संभवतो, असे महावितरणने स्पष्ट केले आहे.

अनेक ठिकाणी वीज वाहिन्या भूमिगत टाकण्यात आल्या असून त्यांच्यापासून दूर अंतरावर होळी पेटवली गेली तर भूमिगत वीजवाहिन्या सुरक्षित राहतील. त्यामुळे शक्यतो मोकळ्या जागेत वा मैदानावर होळी पेटवावी तसेच रंगोत्सव साजरा करताना पाण्याचा फवारा वीज वाहिन्यांपर्यंत उडणार नाही याची खबरदारी घ्यावी. रंग भरलेले फुगे परस्परांवर टाकताना ते वीज वितरण यंत्रणांना लागणार नाहीत, याची काळजी घेतली जावी. ओल्या शरीराने वीज वितरण यंत्रणांना स्पर्श करणे टाळावे व विजेच्या खांबाभोवती पाण्याचा निचरा होणार नाही याचीही दक्षता घेण्याचे सांगण्यात आले आहे. विजेचे अपघात प्राणघातक ठरू शकतात व एक चूकही जीवावर बेतू शकते, हे लक्षात ठेवून घरात धुळवड वा रंगपंचमी खेळताना वीज मीटर, विजेचे प्लग, वीजतारा व वीज उपकरणांचा पाण्यापासून बचाव करा व ओल्या हाताने या वस्तू हाताळणे टाळण्याचेही सांगण्यात आले आहे.