सातपुतेचा जामिनासाठी हायकोर्टात अर्ज

म. टा. प्रतिनिधी, नगर

महानगरपालिकेतील पथदिवे घोटाळ्याप्रकरणी फरार असलेल्या निलंबित विद्युत विभागप्रमुख रोहिदास सातपुतेने अटकपूर्व जामिन मिळविण्यासाठी मुंबई उच्च न्यायालयाच्या औरंगाबाद खंडपीठात धाव घेतली आहे. सातपुतेच्या अटकपूर्व जामिन अर्जावर २० मार्च रोजी सुनावणी होणार आहे.

मनपात ३४ लाख ६५ हजार रुपयांचा पथदिवे घोटाळा झाला असून, या घोटाळ्यात आतापर्यंत सहा आरोपी करण्यात आले आहे. उपायुक्त विक्रम दराडे, लेखाधिकारी दिलीप झिरपे या दोघांना जामिन मंजूर झाला आहे. ठेकेदार सचिन लोटके, लिपिक भरत काळे हे दोघे न्यायालयीन कोठडीत आहे. तर या घोटाळ्यातील प्रमुख आरोपी रोहिदास सातपुते व विद्युत परिवेक्षक बाळासाहेब सावळे हे दोघे आरोपी हे गुन्हा दाखल झाल्यापासून फरार आहेत. घोटाळ्यासंदर्भाच्या महत्वाच्या १८ फाइली सातपुते याने पळविल्या असल्याचा जबाब ठेकेदार लोटके याने पोलिसांना दिलेला आहे. या घोटाळ्यातील तपासासाठी सातपुते व सावळे या दोघे अटक करणे आवश्यक आहे. परंतू गेल्या पावणे दोन महिन्यांपासून हे दोघे फरार आहेत. या आरोपींना वकिलामार्फत जिल्हा व सत्र न्यायालयात अटकपूर्व जामिन मिळविण्यासाठी अर्ज केला होता. हा अर्ज न्यायालयाने नामंजूर केल्यानंतर आता वकिलामार्फत औरंगाबाद खंडपीठात अटकपूर्व जामिन मिळविण्यासाठी अर्ज केला आहे. या अर्जावर बुधवारी (२० मार्च) रोजी सुनावणी ठेवण्यात आली असल्याची माहिती तपासी अधिकारी पोलिस निरीक्षक सुरेश सपकाळे यांनी दिली. सातपुतेचे मुलगा याला पोलिसांनी नोटीस देऊन चौकशीसाठी बोलविले होते. परंतु तो पोलिस चौकशीसाठी हजर राहिला नाही. सातपुतेला पळवून जाण्यासाठी त्याचा मुलगा मदत करत असल्याचा संशय पोलिसांना आहे.