नगरमध्ये थोरातच 'राजे', तांबेंच्या पाठिंब्यावरुन नानांनी पंगा घेतला, थोरातांनी शांत बसून कार्यक्रम केला!

अहमदनगर : विधान परिषदेच्या नाशिक पदवीधर मतदारसंघात आमदार सत्यजित तांबे यांना पाठिंबा देण्यावरून काँग्रेसमध्ये पडझड झाली होती. आता ती भरून काढण्यास पक्षाने सुरवात केली आहे. अहमदनगर जिल्हा ग्रामीणचे प्रभारी अध्यक्ष म्हणून श्रीगोंदा येथील पक्षाचे नेते राजेंद्र नागवडे यांची नियुक्ती करण्यात आली आहे. काँग्रेसचे ज्येष्ठ नेते बाळासाहेब थोरात यांचे ते समर्थक आहेत. प्रदेशाध्यक्ष पटोले यांच्या सूचनेनुसार ही नियुक्ती करण्यात येत असल्याचे पत्रात नमूद करण्यात आले आहे. यावरून नगर जिल्ह्यात थोरात यांचीच मर्जी चालणार असल्याचे दिसून येते.

नाशिक पदवीधर मतदारसंघाच्या निवडणुकीत माजी आमदार डॉ. सुधीर तांबे यांना पक्षाने उमेदवारी दिली होती. मात्र, ऐनवेळी त्यांचे पुत्र सत्यजित यांनी अपक्ष म्हणून उमेदवारी अर्ज दाखल केला. तेव्हा हे प्रकरण खूप गाजले. त्यांच्यावर पक्षाने कारवाईही केली. याचे पडसात पक्षात उमटले. अनेक पदाधिकाऱ्यांनी तांबे यांच्या समर्थनार्थ राजीमाने दिले. यातच नगर ग्रामीणचे तत्कालीन जिल्हाध्यक्ष बाळासाहेब साळुंखे यांचाही समावेश होता. त्यांनी आधी पक्षाने नोटीस पाठविली होती. त्यांनी राजीनामा दिल्यानंतर पक्षानेही त्यांना निलंबित केल्याचे कळविले होते. साळुंखे थोरात यांचे समर्थक आहेत.

तेव्हापासून अध्यक्षपदाची जागा रिक्त होती. मधल्या काळात नगर शहराध्यक्ष किरण काळे यांच्याकडे कामकाज सोपविण्यात आले होते. आता या पदावर प्रभारी अध्यक्ष म्हणून राजेंद्र नागवडे यांची नियुक्ती करण्यात आली आहे. नागवडे हे थोरात यांचे समर्थक आहेत. तांबे यांच्या उमेदवारीवरून थोरात आणि प्रदेशाध्यक्ष पटोले यांच्यातही मतभेद झाल्याच्या चर्चा होत्या. प्रकरण वरिष्ठ नेत्यांपर्यंत गेले होते. त्यानंतर मतभेद दूर झाल्याचे सांगण्यात आले. दोघा नेत्यांनी एकत्रित बैठका आणि कार्यक्रमांनाही हजेरी लावली. त्यानंतर ज्या कार्यकर्त्यांना, पदाधिकाऱ्यांना निलंबित केले, त्यांना पुन्हा घेतले जाईल अशी चर्चा सुरू झाली.

आता यापैकी जिल्हाध्यक्ष या महत्वाच्या पदावर प्रभारी म्हणून नियुक्ती झाली आहे. तेथेही थोरात समर्थक नागवडे यांनाच स्थान मिळाले आहे. त्यावरून नगर जिल्ह्यात पक्षात थोरात यांचाच शब्द अंतिम असणार हेही स्पष्ट झाले आहे. मात्र, ज्यांना निलंबित केले, त्यांना परत घेण्याबद्दलची भूमिका अद्याप स्पष्ट झालेली नाही. मात्र, राजीनामा दिलेले साळुंखे हे पुन्हा पदावर येण्यास इच्छुक नसल्याचे सांगण्यात येते. त्यामुळे त्यांच्य जागेवर नागवडे यांची नियुक्ती केल्याचे दिसते.