लष्करातील पराक्रमाला उजाळा

म. टा. प्रतिनिधी, नगर
पाकिस्तान, बांगलादेश यांच्यासोबत युद्ध करताना आलेले अनुभव एकमेकांना सांगण्यात मग्न असणारे माजी सैनिक... बऱ्याच दिवसानंतर आपल्या बटालियनमधील जवानाची भेट झाल्यामुळे चेहऱ्यावर दिसणारा आनंद... युद्धामध्ये चांगली कामगिरी केल्याबद्दल केला जाणारा गौरव.... आरोग्याची तपासणी करण्यासाठी झालेली गर्दी... सेवानिवृत्त कर्मचाऱ्यांच्या पेन्शनच्या समस्या सोडवण्यासाठी केले जाणारे मार्गदर्शन... असे चित्र रविवारी आर्मड सेंटर व स्कूलमध्ये पाहण्यास मिळाले.
भारतीय सेना व नौदलाच्या माजी सैनिकांसाठी व त्यांच्या कुटुंबियांच्या कल्याणासाठी आर्मड सेंटर व स्कूलमध्ये मेळाव्याचे आयोजन केले होते. मेळाव्यासाठी अहमदनगरसह सोलापूर, बीड, लातूर व उस्मानाबाद जिल्ह्यातील माजी सैनिक व त्यांचे कुटुंबिय सहभागी झाले. मेजर जनरल प्रवीण दीक्षित, रिटायर्ड ले. जनरल व्ही. के. सेवल, पोलिस अधीक्षक डॉ. सौरभ त्रिपाठी यांच्या हस्ते मेळाव्याचे उद्घाटन झाले. यावेळी दीक्षित यांनी सांगितले की, ‘माजी सैनिक व त्यांच्या कुटुंबियांच्या समस्या सोडवण्याचा प्रयत्न या मेळाव्याच्या निमित्ताने करण्यात येईल. त्यासाठी पोलिस, महसुल विभागातील अधिकारी, बँकांचे अधिकारी यांनाही बोलवण्यात आले आहे. माजी सैनिक व त्यांच्या कुटुंबियांसाठी असलेल्या विविध योजनांची माहिती मेळाव्यामध्ये उपलब्ध करुन देण्यात आली असून त्याचाही लाभ घ्यावा,’असे आवाहन दीक्षित यांनी केले. तर, डॉ. त्रिपाठी म्हणाले की, ‘जगामध्ये भारतीय सेनेला सन्मान प्राप्त करुन देण्याचे काम सैनिकांनी केले आहे. सैनिकांना जिल्ह्यात उद्भवणाऱ्या समस्या सोडवण्यासाठी जिल्हाधिकारी यांच्या मदतीने प्रयत्न करण्यात येतील. तसेच माजी सैनिकांनी नोकर भरती प्रक्रियेमध्येही सहभाग घ्यावा,’ असेही त्यांनी सांगितले.
वीरचक्र, शौर्यचक्र व सेना मेडल प्राप्त झालेल्या वीर जवानांचा तसेच शहिद झालेल्या जवानांच्या पत्नी व आई यांचा मेळाव्यामध्ये मान्यवरांच्या हस्ते गौरवचिन्ह देऊन सन्मान करण्यात आला. त्यानंतर मेळाव्यासाठी लावण्यात आलेल्या विविध स्टॉलला भेट देण्याची सूचना करण्यात आली. या स्टॉलवर माजी सैनिक व त्यांच्या कुटुंबियांना सरकारी योजनांच्यासंबंधी माहिती, शैक्षणिक संस्थांमध्ये असणारे आरक्षण, नोकर भरती प्रक्रिया, लष्करी सेवेतून निवृत्त झाल्यानंतर पुन्हा रोजगार मिळविण्यासाठी आवश्यक माहिती देण्यात आली. याशिवाय त्यांच्या पेन्शनची समस्या, आरोग्य विषयक समस्याही सोडवण्यात आल्या.