बनावट स्पोर्ट सर्टिफिकेटच्या आधारे लष्करात भरती

म. टा. प्रतिनिधी, नगर

बनावट स्पोर्ट सर्टिफिकेट सादर करून त्याआधारे लष्करात भरती झाल्याप्रकरणी प्रतिक संजय सिंग (वय १९, रा. पहेलादपूर, ता. खारखोडा, जि. सोनीपत, हरियाना) याच्याविरोधात शुक्रवारी रात्री उशिरा भिंगार पोलिस स्टेशनमध्ये गुन्हा दाखल झाला.

भारतीय लष्करातील महत्त्वाची प्रशिक्षण संस्था असलेल्या येथील मेकॅनाइज्ड रेजिमेंटल सेंटरमध्ये (एमआयआरसी) देशाच्या विविध भागांत भरती झालेले जवान प्रशिक्षणासाठी येत असतात. प्रतिक सिंग हा देखील येथे प्रशिक्षणासाठी आला होता. भरती होताना प्रतिक सिंग याने 'ज्युनियर मेल अॅण्ड फिमेल फ्रिस्टाईल अॅण्ड ग्रिको रोमन हरियाना स्टेट रेसलींग' (कुस्ती) चॅम्पियनशीप स्पर्धेचे स्पोर्ट सर्टिफिकेट सादर केले होते. प्रशिक्षणाला आल्यानंतर त्याने भरती होताना सादर केलेली सर्व कागदपत्र पडताळणी करण्यासाठी पुन्हा संबंधित विभागांना पाठवण्यात आली होती. या वेळी त्याने सादर केलेले स्पोर्ट सर्टिफिकेट हे बनावट असल्याचे समोर आले आहे. त्यानंतर प्रतिक सिंग याच्या विरोधात भिंगार कॅम्प पोलिस स्टेशनमध्ये फसवणुकीचा गुन्हा दाखल करण्यात आला आहे.