प्रा. तांबेंचे आवाहन; स्टील लाइफ प्रात्यक्षिक रंगले
म. टा. प्रतिनिधी, नगर
'कलावंताने कलेचा अभ्यास करताना स्वतःची स्वतंत्र शैली घडवली पाहिजे. चित्रकला व शिल्पकला दृश्यकला असल्याने विद्यार्थ्यांनी विविध कलावंतांचे काम अभ्यासक नजरेने पाहिले तरच त्या कलेची समज वाढीस लागेल व नजर तयार होईल आणि यातून आपली स्वतंत्र अशी शैली सापडेल,' असे प्रतिपादन धुळे स्कूल ऑफ आर्टचे प्राचार्य व अनुदानित कला महाविद्यालय फेडरेशनचे अध्यक्ष प्रा. सुनील तांबे यांनी केले.
तारकपूरच्या प्रगत कला महाविद्यालयात प्रा. तांबे यांच्या 'स्टील लाइफ' विषयावरील प्रात्यक्षिकाचे आयोजन करण्यात आले होते. नगर महापालिकेचे उपायुक्त डॉ. प्रदीप पठारे, प्राचार्य नुरील भोसले, अधिव्याख्याते प्रा. संजय काळे, सहायक अधिव्याख्याते प्रा. एम. एम. सोनटक्के, संजय जोशी आदी या वेळी उपस्थित होते. 'कलाकृती अधिक देखणी होण्यासाठीचे प्रगत तंत्र विद्यार्थ्यांनी अवगत केले पाहिजे,' असे सांगून प्रा. तांबे म्हणाले, 'कला साहित्यातही प्रगती झाली असून त्याची माहिती घेतल्यास आपल्या कलाकृतीच्या सुबक व देखणेपणासह वेगवान कलाकृती निर्मितीसाठी त्याचा लाभ होईल,' असे ते म्हणाले. प्राचार्य भोसले यांचेही या वेळी भाषण झाले. आसना खान हिने परिचय करून दिला.
--