भानुदास कोतकरला जामिन मंजूर

म. टा. प्रतिनिधी, नगर

लॉटरी विक्रेता अशोक लांडे खूनप्रकरणात जन्मठेपेची शिक्षा झालेल्या काँग्रेसचा माजी शहराध्यक्ष भानुदास कोतकर याला मुंबई उच्च न्यायालयाने सोमवारी जामीन मंजूर केला आहे. जन्मठेपेच्या शिक्षेविरुद्धच्या अपिलाचा निकाल लागेपर्यंत हा जामीन मंजूर करण्यात आला असून, जामीन काळात नगर जिल्ह्यात येण्यास कोतकरला न्यायालयाने मज्जाव केला आहे.

लांडे खूनप्रकरणात भानुदास कोतकर व त्याचे तीन मुले माजी महापौर संदीपसह सचिन व अमोल यांना दोषी ठरवून जन्मठेपेचे शिक्षा नाशिक न्यायालयाने सुनावली होती. या निकालाविरुद्ध कोतकरने मुंबई उच्च न्यायालयात अपिल केले आहे. तर जामीन मिळविण्यासाठी भानुदास कोतकरकडून मुंबई हायकोर्टात अर्ज करण्यात आला होता. गेल्या वर्षीच हा अर्ज करण्यात आला होता. न्यायमूर्ती भूषण गवई व भारती डोंगरे यांच्यासमोर या अर्जावर सुनावणी झाली. कोतकर हे वैद्यकीय कारणांमुळे सातत्याने जामिन मागत आहेत. त्यामुळे त्यांच्या सर्व रोगावर ससून, जेजे हॉस्पिटलच्या डॉक्टरांमार्फत तपासणी करावी, त्यानंतर जामिन अर्जावर निर्णय द्यावा, असे प्रतिज्ञापत्रच सरकारी पक्षाकडून मागील सुनावणीला न्यायालयाला देण्यात आले होते. कोतकर याच्या वतीने अॅड. आबाद पोंडा व अॅड. अभय ओस्तवाल यांनी बाजू मांडताना गुन्हाबाबत मुद्दे उपस्थित केले. लांडे खूनप्रकरणात शीरा फिर्याद नोंदविण्यात आले. तसेच पोस्ट मार्टम अहवालाबाबत अनेक मुद्दे कोतकरच्या वकिलांनी उपस्थित केले होते. दोन्ही बाजूच्या युक्तिवादानंतर सोमवारी न्यायालयाने कोतकर याला अटी शर्थीवर शिक्षेच्या अपिलावर निकाल लागेपर्यंत जामीन मंजूर केला आहे. हा जामीन अर्ज मंजूर करताना नगर जिल्ह्याच्या हद्दीत जाण्यास मज्जाव, परदेशात न्यायालयाचा परवानगी शिवाय जाऊ नये, ज्या ठिकाणी राहतील, तेथील पोलिस स्टेशनला दर महिन्याच्या सोमवारी हजेरी लावणे अशी अटी न्यायालयाने घातल्या आहेत.