चोरीच्या दुचाकी मिळाल्या

म. टा. प्रतिनिधी, नगर

शहरातून चोरीला गेलेल्या दुचाकी पोलिसांनी शोधून काढल्या असून त्या त्यांच्या मालकांना गुरुवारी परत केल्या. काही जणांच्या दुचाकी चोरीला जाऊन आठ महिने झाले होते. त्यांनी गाडी परत मिळण्याची आशाही सोडली होती.

कोतवाली पोलिस स्टेशनच्या हद्दीतून चोरीला गेलेल्या २० मोटारसायकली, मोपेड पोलिसांनी चोरट्यांकडून हस्तगत केल्या आहेत. या गाड्या परत करण्यासाठी कोतवाली पोलिस स्टेशनला कार्यक्रमाचे आयोजन करण्यात आले होते. नाशिक परिक्षेत्राचे विशेष पोलिस महानिरीक्षक विनयकुमार चोबे यांच्या हस्ते या गाड्या मूळ मालकाला देण्यात आल्या. या वेळी पोलिस अधीक्षक डॉ. सौरभ त्रिपाठी, अतिरिक्त पोलिस अधीक्षक घनश्याम पाटील, सहायक पोलिस अधीक्षक चिन्मय पंडित, पोलिस निरीक्षक सोमनाथ मालकर, शांतता समितीचे सदस्य अॅड. शिवाजी कराळे, नलिनी गायकवाड, उबेद शेखसह इतर सदस्य उपस्थित होते.

चोबे म्हणाले, ‘चोरीला गेलेल्या मोटारसायकली शोधून देऊन त्या परत करण्याचे चांगले काम कोतवाली पोलिसांनी केले आहे. मोटारसायकली, चेनस्नॅचिंगचे आणखी गुन्हे उघडकीस करून जास्तीत मुद्देमाल परत केला पाहिजे. पोलिसांसह समाजातील सर्वांनी जबाबदारीने काम केल्यास समाजात शांतता प्रस्थापित होईल’, अशी अपेक्षा चोबे यांनी व्यक्त केली.

चोरीच्या मोटारसायकली काही जणांना आठ महिन्यांनंतर, काहींना महिन्याभरात परत मिळाल्या आहेत. केनिथ गायकवाड यांची मोपेड आठ महिन्यांपूर्वी चोरीला गेली. गाडी मिळत नसल्याने त्यांना दुसरी गाडी विकत घेतली. गाडी शोधल्याबाबत त्यांनी पोलिसांचे आभार मानले. वाडिया पार्क येथून दत्तात्रय मिसाळ यांची गाडी गेल्या महिन्यांत चोरीला गेली होती. गंज बाजार येथून रशिद पठाण यांची गेल्या महिन्यांत गाडी चोरीला गेली होती.