चला, पक्षी पाहू या...

म. टा. प्रतिनिधी, नगर

नगमधील निसर्ग मित्रमंडळाच्या पुढाकाराने ‘चला पक्षी पाहू’ हा उपक्रम हाती घेण्यात आला असून, याअंतर्गत येत्या रविवारी (४ डिसेंबर) सकाळी सात वाजता कापूरवाडी तलावावर पक्षीनिरीक्षण कार्यक्रम होणार आहे. यात पक्षीमित्रांनी सहभागी होण्याचे आवाहन पक्षीमित्र डॉ. सुधाकर कुऱ्हाडे यांनी केले आहे.

यंदा चांगला पाऊस झाल्याने बुऱ्हाणनगरजवळील कापूरवाडी तलावात भरपूर पाणी साठले आहे. त्यामुळे खूप वर्षांनी स्थानिक व स्थलांतरीत पक्ष्यांचे येथे आगमन होऊ लागले आहे. चांदवा, पाणडुबी, वैष्णव, थापट्या, तलवार बदक, हळदीकुंकू या बदकांसह लहानमोठे बगळे, चमचे, तुतवार, खंड्या, पाकोळ्या, वेडा राघू आदी पक्षी येथे आले असल्याचे डॉ. कुऱ्हाडे यांनी सांगितले. फ्लेमिंगो (रोहित), चित्रबलाक, मुग्धबलाक, राखी, करकोचा हे पक्षीही येथे आले आहेत. त्यामुळे येत्या रविवारी (४ डिसेंबर) सकाळी येथे पक्षीनिरीक्षण होणार असून, यात सहभागी होऊ इच्छिणाऱ्या निसर्गप्रेमींनी दुर्बिण, कॅमेरा, टोपी, पाण्याची बाटली, पेन, पेन्सिल, नोंदवही आदींसह उपस्थित राहण्याचे आवाहन बाळासाहेब कुलकर्णी, कार्तिकस्वामी इंगळे यांनी केले आहे. अधिक संपर्क- ९४०४६९६४६९.