कापूरवाडी परिसरात पक्ष्यांचा मेळा

म. टा. प्रतिनिधी, नगर
अथांग पसरलेल्या निळ्याशार पाण्यात पोहणारी बदके...या पाण्यावरून उडणारे अनेकविध पक्षी...विविध झाडाझुडुपांवर बसून खाद्यावर लक्ष ठेवून असलेले पक्षी... चांदवा, पाणडुबी, खंड्या, चमचा, चक्रवाक अशा विविध पक्ष्यांची आसमंतात पसरलेली किलबिल...असे चित्र सध्या कापूरवाडी तलावावर पाहायला मिळत आहे. हातातील दुर्बिणी व कॅमेरे सावरत निरीक्षण व फोटोग्राफीसह नोंद घेण्यासाठी पक्षीप्रेमींचीही धांदल उडाल्याचे दिसत आहे. या पक्षीनिरीक्षणात तपकिरी डोक्याचा कुरव प्रथमच नगर परिसरात आढळला.
महाराष्ट्र पक्षीमित्र संघटनेशी संलग्न असलेल्या येथील निसर्ग मित्र मंडळाच्या पुढाकाराने रविवारी ‘चला पक्षी पाहू या’ हा उपक्रम राबविण्यात आला. नगर शहरापासून पाच किलोमीटर अंतरावर बुऱ्हाणनगर रोडला कापूरवाडी तलावाच्या परिसरात अनेक देश-विदेशी पक्ष्यांचा सतत वावर असतो. गेल्या तीन वर्षांपासून दुष्काळी परिस्थितीमध्ये हा तलाव कोरडा पडला होता. त्यामुळे या परिसरातील पक्षी देखील गायब झाले होते. यंदा समाधानकारक पाऊस झाल्यामुळे या तलावात पाणी आले असून अनेकविध पक्षी या परिसरात येऊ लागले आहेत. त्यामुळेच वेगवेगळ्या प्रकारचे पक्षी पाहून त्यांचा अभ्यास करता यावा, यासाठी पक्षीमित्रांनी गर्दी केली होती. सात वाजल्यापासून पक्षीनिरीक्षण सुरू झाले. तलावात नजर जाईल तिथपर्यंत दिसणारे अथांग पाणी, झाडा-झुडपात व पाण्यावर तरंगणाऱ्या पक्ष्यांना शोधणाऱ्या पक्षीमित्रांच्या नजरा, दुर्बिणीमधून पक्षी पाहणाऱ्या महिला व चिमुकली मंडळी तर, दुसरीकडे पक्ष्यांची छायाचित्रे टिपण्यासाठी छायाचित्रकारांची सुरू असलेली धडपड, असे उत्साही वातावरण होते. पक्षीमित्र डॉ. सुधाकर कुऱ्हाडे, बाळासाहेब कुलकर्णी, कार्तिकस्वामी इंगळे यांच्या मार्गदर्शनाखाली हे पक्षीनिरीक्षण झाले.