मागण्या, आंदोलनांनंतर करोनाग्रस्तांच्या मदतीसाठी भाजप आता प्रत्यक्ष मैदानात

म.टा. प्रतिनिधी, नगरः करोना संकट काळात विविध मागण्या आणि आंदोलनांच्या माध्यमातून राज्य सरकारला सतत धारेवर धरल्यानंतर आता भारतीय जनता पार्टीने प्रत्यक्ष कामासाठी मैदानात उतरण्याचा निर्णय घेतला आहे. नगर शहरातील भाजपच्या पदाधिकाऱ्यांनी हा निर्णय घेतला असून त्यासाठी स्वतंत्र समिती स्थापन करण्यात येणार आहे.

करोना ही राष्ट्रीय अपत्ती असून उपाययोजना करण्यासाठी आरोग्य यंत्रणेवर ताण आला आहे, त्यामुळे पक्षाच्या पदाधिकाऱ्यांनी प्रत्यक्ष कामात अधिक सक्रीय होण्याचा निर्णय घेतल्याचे शहर जिल्हाध्यक्ष भय्या गंधे यांनी यासाठी बोलाविण्यात आलेल्या बैठकीत सांगितले. महौपार बाबासाहेब वाकळे व गंधे यांच्या उपस्थित ही बैठक झाली. आतापर्यंत शहर आणि जिल्ह्यातील पक्षाच्या पदाधिकाऱ्यांनी करोनासंबंधी विविध मागण्या केल्या, निवेदने दिली, आंदोलनेही केली. आता मात्र, थेट प्रत्यक्ष कामात सहभागी होण्याचे ठरविण्यात आले आहे.

यासंबंधी गंधे म्हणाले, नगर शहरात करोनाचा प्रसार मोठ्या प्रमाणात वाढत असल्यामुळे नागरिकांमध्ये भीतीचे वातावरण पसरले आहे. नागरिकांमध्ये करोना संदर्भात माहिती व जनजागृती नसल्यामुळे त्यावरील उपयायोजना काय आहेत, याची माहिती होणे गरजेचे आहे. रुग्णांची संख्या मोठ्या प्रमाणात वाढल्यामुळे शासकीय आरोग्य यंत्रणेवर ताण आला आहे. ही राष्ट्रीय आपत्ती आहे. यामध्ये जनतेला सुविधा उपलब्ध करुन देणे गरजेचे आहे. पीएम केअरच्या माध्यमातून जिल्हा रुग्णालयाला पन्नास व्हेंटिलेटर उपलब्ध झालेले आहेत.

मोदी फक्त चार तास झोपतात, तेवढा वेळ तरी काम करा; भाजपचा सीएमना टोला

नागरिकांच्या आरोग्यासाठी भाजपाच्यावतीने नगर शहरामध्ये उपाययोजना करण्यासाठी शहरातील नामवंत डॉक्टर तसेच आयुर्वेद क्षेत्रातील डॉक्टर यांना एकत्रित करुन काम करणार आहे. भाजप पक्षातील पदाधिकाऱ्यांची ११ जणांची समिती तयार करुन नागरिकांना कोरोना संदर्भात मदत करणार आहेत. कोरोनाच्या संकटामध्ये भाजपाचे पदाधिकारी, कार्यकर्ते गेल्या सहा महिन्यापासून काम करत आहेतच. आता वेगवेगळ्या भागामध्ये टीमवर्कच्या माध्यमातून काम करणार आहेत.

करोनाची कॉलर ट्यून ऐच्छिक हवी का? रोहित पवारांच्या सर्वेक्षणात 'हे' मिळाले उत्तर

सरकारकडून मदत नाही : महापौर

महापौर वाकळे म्हणाले की, कुठल्याही प्रसिद्धीच्या मागे न लागता भाजपचे कार्यकर्ते नि:स्वार्थपणे जनतेला सहकार्य करत आहेत. गेल्या सहा महिन्यामध्ये महानगरपालिकेला सरकारने कुठलीही आर्थिक मदत दिलेली नाही. महापालिकेने नागरिकांच्या आरोग्य सुविधेबरोबरच अन्नछत्र सुरु करून अन्नदान केले. शहरामध्ये महापालिकेच्या माध्यमातून करोना सेंटरची उभारणी केली. नगरकरांना दिलासा देण्याचे काम केले. या पुढील काळातही भाजपच्या माध्यमातून विविध कामे करण्यात येणार आहेत.