भाजपविरोधात सर्वपक्षीयांची एकी

म. टा. वृत्तसेवा, नगर

दुष्काळाच्या निमित्ताने नगर तालुक्यातील राजकीय संघर्षाचे पर्व पुन्हा एकदा सुरू होण्याची चिन्हे आहेत. शिवसेनेचे जिल्हाप्रमुख प्रा. शशिकांत गाडे यांच्या नेतृत्वाखाली चारा व पाणीटंचाई प्रश्नासंदर्भात सुरू केलेल्या आंदोलनात राष्ट्रवादीचे तालुकाध्यक्ष केशव बेरड व पंचायत समिती सदस्य गोविंद मोकाटे यांच्या पाठोपाठ दुसऱ्या दिवशी काँग्रेसचे ज्येष्ठ नेते दादा पाटील शेळके यांनी हजेरी लावली. आगामी काळात इतर नेतेही शिवसेनेच्या आंदोलनात सहभागी होणार असल्याने तालुक्यातील नव्या राजकीय समीकरणाचे संकेत मिळत आहेत.
माजी खासदार दादा पाटील शेळके यांच्या राजकीय वर्चस्वाला ओहोटी लागल्यानंतर आमदार शिवाजी कर्डिले यांनी तालुक्यातील सत्तास्थानांवर कब्जा घेतला होता. प्रा. गाडे यांनी आमदार कर्डिले यांच्या आमदार कर्डिले यांना आव्हान देत केलेल्या आंदोलनांमुळे नगर तालुक्यातील शिवसेना वाढली. सुमारे दहा वर्षांपूर्वी आमदार कर्डिले हे राष्ट्रवादी काँग्रेसमध्ये होते. त्या वेळी झालेल्या पंचायत समिती व जिल्हा परिषद निवडणुकांमध्ये शिवसेना, भाजप व काँग्रेस युतीने आमदार कर्डिले गटाचा पराभव करत पंचायत समितीवर भगवा फडकावला होता. गाडे-कर्डिले सोयरीकीनंतर तालुक्यातील संघर्ष कमी होत गेला. शिवसेनेचे कार्यकर्त्यांमधील आक्रमकता कमी झाली होती. साडेचार वर्षांपूर्वी आमदार कर्डिले हे जिल्हाबंदीमुळे निवडणूक प्रक्रियेत प्रत्यक्ष सक्रिय नव्हते. त्या वेळी प्रा. गाडे यांनी शिवसेनेने स्वतंत्र किंवा काँग्रेसशी युती करून निवडणूक लढविली असती तर कर्डिले यांच्या पक्षीय वर्चस्वाला शह बसला असता. प्रा. गाडे यांनी नातेसंबंधांतून आमदार कर्डिले यांच्या अडचणीच्या काळात साथ दिली. त्यानंतर झालेल्या विधानसभा व नुकत्याच झालेल्या विधानपरिषद निवडणुकांमध्ये मात्र कर्डिले गटाकडून प्रा. गाडे यांना ठेंगा दाखविला गेल्याने प्रा. गाडे अस्वस्थ झाले. त्यातून नव्या राजकीय समीकरणांच्या जुळवाजुळवीसंर्भात बैठका सुरू झाल्या.
आगामी सहा महिन्यांत बाजार समिती व त्यानंतर जिल्हा परिषद व पंचायत समितीच्या निवडणुका होणार आहेत. दुष्काळी प्रश्नासंदर्भात शिवसेनेच्या आंदोलनात पहिल्या दिवशी राष्ट्रवादी व त्यानंतर काँग्रेसच्या गटाने प्रा. गाडे यांना दिलेला पाठींबा पाहता आगामी राजकीय समीकरणाची दिशा स्पष्ट होत आहे.