उमेदवारांना अजूनही बनावट दारूची धास्ती

म. टा. वृत्तसेवा, नगर

निवडणुकीच्या काळात शिल्लक राहिलेली दारू शोधण्यासाठी उमेदवार व त्यांच्या समर्थकांकडून शोध मोहीम सुरू आहे. बनावट दारूच्या भीतीने ढाबे व वाइन शॉपवरील गर्दीही कमी झाली असल्याची माहिती व्यावसायिकांनी दिली.

जिल्ह्यात सर्वच ठिकाणच्या निवडणुकीत चुरस होती. मतदारांना आपलेसे करण्यासाठी बहुतांश उमेदवारांनी सर्रास दारू पार्ट्यांचे आयोजन केले होते. राज्य उत्पादन शुल्क, पोलिस प्रशासनाच्या सोयीस्कर डोळेझाकपणामुळे जिल्ह्यात सर्वत्र बनावट दारूचा महापूर आला होता. पांगरमल दुर्घटनेनंतर राजकारण्यांचे डोळे उघडले. पांगरमलसारखी दुर्घटना आपल्या जिल्हा परिषद गटात किंवा पंचायत समिती गणात घडू नये या धास्तीने उमेदवारांची झोप उडाली आहे. निवडणुकीच्या काळात उमेदवारांकडून वाटप केलेली दारू आठ ते पंधरा दिवस पिणारेही आहेत. नगर तालुक्यातील पांगरमलबरोबरच बाबुर्डी घुमट, दरेवाडी, कौडगाव पारनेर तालुक्यातील दैठणे गुंजाळसारख्या ठिकाणी दारूमुळे मृत्युमुखी पडणाऱ्यांची संख्या वाढत आहे. आपल्या गटात बनावट दारू आली नाही ना, आपल्या गटातील कुणी यात दगावू नये यासाठी उमेदवार धास्तावले आहेत. मागील दोन-तीन दिवसांपासून उमेदवारांनी आपल्या समर्थकांना शिल्लक दारूच्या बाटल्या गोळा करण्याचे फर्मान सोडले आहे.