जॉगिंग पार्कचे काम निकृष्ठ
पाथर्डी : पालिका हद्दीत सुरू असलेले कोट्यवधी रुपये खर्चाचे स्व. गोपीनाथ मुंडे जॉगिंग पार्कचे सध्या चालू असलेले काम निकृष्ठ दर्जाचे चालू असून या कामाची चौकशी करून हे काम करणाऱ्या ठेकेदारावर कारवाई करावी, अशी मागणी सामाजिक कार्यकर्ते वसंत कुसळकर यांनी जिल्हाधिकऱ्यांकडे केली असून कारवाई न केल्यास उपोषण करण्याचा इशारा दिला आहे. या संदर्भात दिलेल्या निवेदनात म्हटले आहे की, शेवगाव रोड लगत जॉगिंग पार्कचे काम सध्या चालू असून हे काम दिलेल्या अंदाज पत्रकाप्रमाणे केले जात नाही. या कामासाठी जी वाळू, सिमेंट व वीट वापरली जात आहे तिचा दर्जा निकृष्ठ आहे. ज्या पद्धतीने सिमेंटचा वापर करावयास हवा तसा केला जात नसल्याने कामाचा दर्जा खालावला आहे. या सर्व कामाची चौकशी करून हे काम करणाऱ्या ठेकेदारावर कारवाई करावी, अन्यथा आपण उपोषण करू, असा इशारा निवेदनाच्या शेवटी देण्यात आला आहे.
---