मनपात हमरीतुमरी

म. टा. प्रतिनिधी, नगर

बजेट चर्चेसाठीच्या महासभेत विरोधी पक्षनेता निवडीवरून सत्ताधारी शिवसेना व विरोधी राष्ट्रवादीच्या सदस्यांमध्ये वादावादी व हमरीतुमरी झाल्याने महापौर सुरेखा कदम यांना दोनदा सभा तहकूब करावी लागली. आता गुरुवारी (३० मार्च) दुपारी १ वाजता ही सभा पुढे सुरू
होणार आहे.

मनपाचे यंदाचे ५५० कोटीचे बजेट स्थायी समितीने दोन दिवसांपूर्वी महासभेत सादर केले आहे. यंदाच्या या बजेटचा अभ्यास करण्यासाठी दोन दिवसांची मुदत महापौर कदम यांनी दिली होती. त्यानुसार २७ रोजी तहकूब केलेली ही सभा बुधवारी सुरू झाली, पण तिची सुरुवातच वादंगाने झाली. राष्ट्रवादीचे नगरसेवक संजय घुले यांनी ‘सभागृहात विरोधी पक्ष नेता नसल्याने बजेटवर चर्चा होऊ शकत नाही, त्यामुळे ही नियुक्ती महापौरांनी लगेच जाहीर करावी’, अशी मागणी केली. त्यावरून जोरदार वादावादी सुरू झाली.

राष्ट्रवादी आक्रमक

विरोधी पक्षनेता नियुक्त केला जात नाही म्हणून दंडाला काळ्या फिती बांधून आलेले राष्ट्रवादीचे नगरसेवक या मुद्द्यावर सभागृहात आक्रमक होते. घुले यांच्यासह माजी महापौर अभिषेक कळमकर, संपत बारस्कर, कुमारसिंह वाकळे, आरिफ शेख, विजय गव्हाळे, स्वप्निल शिंदे, विपुल शेटिया, तसेच काँग्रेसचे फय्याज शेख, सुनील कोतकर यांनी ‘नही चलेगी, नही चलेगी, दादागिरी नही चलेगी’, अशी जोरदार घोषणाबाजी केली. ‘गटनेतेपदाचा वाद न्यायप्रविष्ट असल्याने त्याचा निकाल झाल्यावर विरोधी पक्षनेता नियुक्ती केली जाईल’, असे महापौर कदम यांनी स्पष्ट केले.

सत्ताधारीही झाले आक्रमक

सुरुवातीला राष्ट्रवादीच्या आक्रमकतेचा सामना करणाऱ्या महापौरांच्या मदतीला सत्ताधारी आघाडीतील सातपुते व आगरकर वगळता अन्य कोणी पुढे आले नाही. मात्र, तहकूब झालेली सभा पुन्हा अर्ध्यातासाने सुरू झाल्यावर सत्ताधारी गटातील भाजप व शिवसेनेच्या नगरसेवकांनी सभेचे कामकाज सुरू करण्याची मागणी केली. ही सर्व मंडळी उठून उभी राहिली. ते पाहून राष्ट्रवादीचे नगरसेवक पुढे सरसावले व त्यांनी विषयाचे वाचन करणाऱ्या कर्मचाऱ्यास रोखले. अखेर नगरसेवक कैलास गिरवले, गणेश भोसले, दीप चव्हाण आदींनी समन्वयाने मार्ग काढण्याचे आवाहन केले. सभागृह नेते अनिल शिंदे यांनीही सभा उद्यापर्यंत तहकूब करण्याची मागणी केली.