बैलाने घेतला मंगळसूत्राचा घास अन्...

अहमदनगर: शेतकरी पोळ्याच्या दिवशी आपल्या बैलांना पुरणपोळीचा गोड घास भरवितात. पण संगमनेर तालुक्यातील एका शेतकऱ्याच्या बैलाने पोळीसोबत ताटातील खऱ्या सोन्याचाच घास घेतला. त्यामुळे पुढे त्याला यातना सहन कराव्या लागल्या. त्याने गिळलेले चार तोळे सोने बाहेर काढण्यासाठी त्याच्यावर शस्त्रक्रिया करावी लागली.

संगमनेर तालुक्यातील रायते वाघापूर येथील शेतकरी बापूसाहेब प्रभाकर शिंदे यांच्या खिलार बैलाने पोळ्याच्या दिवशी पुरण पोळीचा नैवेद्द चारताना ताटातून चार तोळ्यांचे सोन्याचे गंठण खाल्ले होते. बैलाला ओवाळतात ताटात हे सोने ठेवले होते. घासासोबत बैलाने तेही खाल्ले. हे सोने आपोआप बाहेर पडण्याची वाट पाहिली. मात्र तसे झाले नाही. त्यामुळे पशुवैद्यकीय डॉक्टरांनी तपासणी करून शस्त्रक्रिया करण्याचा सल्ला दिला.

डॉ. नारायण नेहे पाटील यांनी मेटल डिटेक्टर यंत्राने तपासणी केली असता मंगळसूत्र बैलाच्या पोटात आढळून आले. त्यानंतर ऑपरेशन करून ते बाहेर काढण्यात आले. सोन्याचा तो घास बैलाला चांगलाच महागात पडला. ओवाळतात मालक-मालकीण यांच्याकडून झालेल्या निष्काळजीपणाची शिक्षा बिचाऱ्या बैलाला भोगावी लागली.