शेवगाव : शहरापासून तीन कि. मी. अंतरावर असलेल्या खुंटेफळनजीक येथील रमेश देवराव डाके यांच्या शेतात शनिवारी (१५ सप्टेंबर) वीजवाहक तारा पडून डाके यांचा अडीच एकर ऊस जळाला. या बाबत अधिक माहिती अशी की, वाऱ्यामुळे डाके यांच्या शेतात असलेल्या वीजवाहक तारा तुटल्या. या वेळी मोठा आवाज झाल्यानंतर डाके व तेथे आसपास असलेले नागरिक आजूबाजूला पळाले. त्यानंतर उसाच्या पिकाने पेट घेतला. जवळच असलेल्या नागरिकांनी तीन तास या उसावर पाण्याचा मारा करून आग आटोक्यात आणली. मात्र, तोपर्यंत अडीच एकर ऊस पूर्णपणे खाक झाला होता. डाके यांच्या लगत असलेल्या शेतकऱ्यांच्या शेतात आग पसरली असती तर मोठा अनर्थ झाला असता. डाके यांनी ऊस लावण्यासाठी एका राष्ट्रीयकृत बँकेचे साडेतीन लाख रुपयांचे कर्ज काढले आहे. चालू हंगामात त्यांचा ऊस कारखान्यावर नेण्यात येणार होता. मात्र आता ऊस जळाल्याने घेतलेले कर्ज कसे फेडायचे याची चिंता डाके यांना लागून राहिली आहे.
विजेच्या तारा तटून ऊस जळाला
शहरापासून तीन कि मी...
Maharashtra Times 17 Sep 2018, 4:00 am