‘सीए-सीपीटी’साठी ३० जूनपर्यंत मुदत

म. टा. प्रतिनिधी, नगर
दहावीनंतर चार्टर्ड अकाउटंट (सीए) करण्याची इच्छा असणाऱ्या विद्यार्थ्यांना सीए-सीपीटी परीक्षेसाठी नोंदणी करण्यासाठी ३० जूनपर्यंत मुदत आहे. त्यामुळे विद्यार्थ्यांनी लवकरात लवकर आपले नोंदणी करून घ्यावी, असे आवाहन अहमदनगर ब्रँच ऑफ आयसीएआय (ICAI) चे अध्यक्ष सीए प्रसाद भंडारी यांनी केले.
द इन्स्टिट्युट ऑफ चार्टर्ड अकाउटंट ऑफ इंडिया या सीए अभ्यासक्रमाची परीक्षा घेणाऱ्या संस्थेने नुकताच आपल्या अभ्यासक्रमात बदल केला आहे. सीए करण्याची इच्छा असणाऱ्या विद्यार्थ्यांना सीपीटी, आयपीसीसी व फायनल अशा परीक्षा द्याव्या लागतात. दहावी पास झालेला कोणताही विद्यार्थी सीए-सीपीटी परीक्षेसाठी नोंदणी करू शकतो. त्यासाठी ३० जूनपर्यंत मुदत आहे. या तारखेनंतर ज्या विद्यार्थ्यांना सीए करायचे असेल त्यांना सीपीटी ऐवजी बारावीनंतर सीए फाउंडेशन परीक्षेला नोंदणी करावी लागेल. या दोन्ही परीक्षेमधील मुलभूत फरक म्हणजे सीपीटी ही परीक्षा दोनशे मार्काची व वैकल्पिक स्वरूपाची आहे. तर, बारावीनंतरची परीक्षा चारशे मार्कांची असून त्यापैकी दोनशे मार्क वैकल्पिक व दोनशे मार्क विषयानिहाय असणार आहेत. या दोन्ही परीक्षांबाबत विद्यार्थ्यांना बुरुडगाव रोड येथील आयसीएआय भवन येथे अधिक माहिती देण्याची व्यवस्था करण्यात आली आहे, असेही भंडारी यांनी सांगितले.