म. टा. प्रतिनिधी, नगर शतक महोत्सवी परंपरा असलेल्या येथील नगर अर्बन मल्टीस्टेट बँकेची निवडणूक या वर्षाखेरीस होणार असून, बँकेचे अध्यक्ष खासदार दिलीप गांधी यांनी विरोधकांना या निवडणुकीत उतरण्याचे आव्हान दिले आहे. त्यामुळे व्हॉट्सअॅप वा अन्य सोशल मीडियाच्या माध्यमातून बँकेच्या कारभाराची लक्तरे मांडणाऱ्यांना निवडणुकीच्यादृष्टीने आता तयारी करावी लागणार आहे. खासदार गांधी यांनी बँक विरोधकांवर जोरदार टीका येथे केली. 'काही मूठभर विरोधक समोर न येता बाहेरून टीकाटिप्पणी करीत आहेत. त्यांनी बँकेशी व्यवहार केला असता व बँकेच्या प्रगतीत सहभाग घेऊन जर विरोध केला तर समजू शकतो; मात्र, ज्यांनी बँकेशी रुपयाचा व्यवहार केला नाही, अशांनी बँकेत उठाठेव करू नये,' असे सांगून, 'लोकशाही मार्गाने निवडणुका लढण्याचा सर्वांना अधिकार आहे. बँकेच्या होणाऱ्या निवडणुकीत समोर या, मग पाहू सभासद मतदार कोणाच्या पाठीमागे उभे राहतील,' असे आव्हान त्यांनी दिले. 'या वर्षाखेरीस बँकेच्या निवडणुकीस सामोरे जायचे आहे. पाच वर्षांत केलेल्या प्रगतीचा आलेख सर्वांसमोर ठेवणार आहे. आमचा पूर्ण पारदर्शी कारभार आहे. सभासद चांगले काम करून बँकेची प्रगती करणाऱ्यांमागे आहेत की बँकेच्या प्रगतीत काडीचेही योगदान नसणाऱ्या व केवळ टिकाटिप्पणी करणाऱ्यांच्या मागे आहेत, हे निवडणुकीत कळेलच,' असेही त्यांनी स्पष्ट केले.
'अर्बन' विरोधकांना निवडणुकीचे आव्हान
म टा...
MT 13 May 2019, 4:00 am