धर्मादाय संस्थांची होणार संगणकीय नोंद

म. टा. प्रतिनिधी, नगर

राज्यभरातील धर्मादाय संस्थांचे रेकॉर्ड अद्ययावत करण्यासाठी या संस्थांसंदर्भातील सर्व माहिती कॉम्प्युटरमध्ये नोंदवली जाणार असल्याची माहिती राज्याचे धर्मादाय आयुक्त शशिकांत सावळे यांनी येथे दिली. सार्वजनिक विश्वस्त संस्थांच्या या डिजिटायझेशन प्रक्रियेमुळे या संस्थांविषयीची माहिती मिळणे सुलभ होईल, असा विश्वासही त्यांनी व्यक्त केला.

नगर येथील नव्या धर्मादाय उपायुक्त कार्यालयाचे उद्घाटन सावेडीच्या प्रशासकीय इमारतीत (तहसील कार्यालय, टीव्ही सेंटर) मुंबई उच्च न्यायालयाचे न्यायमूर्ती कमलकिशोर तातेड यांच्या हस्ते मंगळवारी झाले. या वेळी मुंबई उच्च न्यायालयाचे न्यायमूर्ती विश्वास जाधव व प्रकाश नाईक, धर्मादाय आयुक्त सावळे, तसेच नगरचे प्रधान जिल्हा न्यायाधीश श्रीकांत कुलकर्णी, जिल्हाधिकारी अनिल कवडे, नगरच्या धर्मादाय उपायुक्त हिरा शेळके, शहर वकील संघाचे अध्यक्ष लक्ष्मण कचरे, धर्मादाय विधिज्ञ संघाचे अध्यक्ष भीमराव काकड उपस्थित होते.

राज्यात ८ लाखांवर धर्मादाय संस्था असून, त्यांच्याद्वारे ५० हजार कोटींपेक्षा अधिक रकमेची उलाढाल होते. या संस्थांसंदर्भातील सर्व रेकॉर्ड जीर्ण झाले असल्याने ते अद्ययावत करण्याचे काम सुरू करण्यात आले आहे. या सुविधेमुळे संस्थांबाबतचे जुने संदर्भ, तसेच वेळोवेळी झालेले बदल लवकर उपलब्ध होणे शक्य होईल, असे सावळे यांनी स्पष्ट केले.

धर्मादाय उपायुक्त कार्यालय काही काळ गांधी मैदान व कापड बाजारात होते. त्यानंतर स्टेशन रोडवरील स्वस्तिक चौकातील गणेशवाडी परिसरात गेले. जुन्या वाड्याच्या स्वरुपातील ही भाडोत्री जागा अपुरी पडत असल्याने सावेडीच्या प्रशासकीय इमारतीच्या विस्तीर्ण जागी त्याचे स्थलांतर करण्यात आले आहे. या कार्यालयात नवे कोर्ट रूम, निरीक्षक दालने व अन्य सुविधा करण्यात आल्या आहेत.