बाल विकास केंद्र विशेष आहाराच्या प्रतिक्षेत

म. टा. प्रतिनिधी, नगर

जिल्ह्यातील ग्राम बाल विकास केंद्रांतील कुपोषित बालकांसाठी विशेष आहार पुरवठा झालेला नाही. या केंद्रांतील बालकांना जिल्हा परिषदेकडून आहार पुरवठा केला जात आहे. या केंद्रांना विशेष आहार व निधीची मागणी केली असल्याची माहिती महिला व बालकल्याण विभागातून देण्यात आली.

कुपोषणमुक्तीसाठी अंगणवाडीत केंद्र सुरू करण्याचा निर्णय घेण्यात आला. ० ते ६ वयोगटातील सर्व बालकांची वजन, उंची, दंडघेर, पायावरील सूज या निकषावर पडताळणी करण्यात येऊन त्यामध्ये तीव्र कुपोषित आढळून येणाऱ्या बालकांना ग्राम बाल विकास केंद्रात प्रवेश देण्यात येणार आहे. जिल्ह्यातील अशा चारशे तीव्र कुपोषित बालकांना केंद्रात दाखल केले आहे. या केंद्रात बालकांना कुपोषणाच्या समस्येतून बाहेर काढण्यासाठी प्रयत्न केले जाणार आहे. अंगणवाड्यात दिल्या जाणाऱ्या रोजच्या आहाराबरोबरच विशेष आहार दिला जाणार आहे. यातून कुपोषणाचे प्रमाण कमी होणार आहे. या केंद्रांकडे मात्र सरकारने दुर्लक्ष केले आहे. केंद्रांतील बालकांसाठी विशेष आहार अद्यापही मिळालेला नाही. त्यामुळे या केंद्रांतील बालकांना नेहमीचा पोषण आहार दिला जात आहे. जिल्हा परिषदेकडून वरिष्ठ स्तरावर पाठपुरावा सुरू असून साधारण पुढील महिन्यापर्यंत आहार मिळण्याची शक्यता आहे, असे महिला बालकल्याण विभागाचे उपमुख्य कार्यकारी अधिकारी मनोज ससे यांनी सांगितले.