नगर : स्नेहालय संचलित चाइल्डलाइन संस्थेच्या वतीने बालदिन (१४ नोव्हेंबर) उत्साहात साजरा करण्यात येणार आहे. यावर्षीही बालदिनाच्या निमित्ताने 'चाइल्डलाइन से दोस्ती' हा सप्ताह १४ ते २० नोव्हेंबर याकाळात साजरा करण्यात येणार आहे. यानिमित्ताने बालहक्कांचा जागर करण्यासाठी विविध उपक्रमांचे आयोजन करण्यात येणार आहे.
चाइल्डलाइन हा स्नेहालय यांच्या अंतर्गत बालकांसाठी चालवला जाणारा प्रकल्प असून ० ते १८ वयोगटातील अनाथ, निराधार, गरीब, गरजू आणि काळजी व संरक्षणाची गरज असणाऱ्या बालकांसाठी काम करतो. १०९८ हा चाइल्डलाइनचा मोफत हेल्पलाइन क्रमांक आहे. गुरुवारी (१४ नोव्हेंबर) चाइल्डलाइन यांच्यासह मराठी पत्रकार परिषद व रोटरी क्लब ऑफ अहमदनगर सेंट्रल यांच्या संयुक्त विद्यमाने बालदिन उत्साहात साजरा करण्यात येणार आहे. तसेच चाइल्डलाइनद्वारे १४ ते २० नोव्हेंबर या काळात विविध उपक्रमांमध्ये बालहक्कांचा जागर नगरमधील झोपडपट्ट्या, लालबत्ती विभाग आणि काही प्रमुख शैक्षणिक संकुलांमधुन करण्यात येणार आहे, अशी माहिती संस्थेच्या वतीने देण्यात आली आहे.