त्यांचे स्थलांतर करा

म. टा. प्रतिनिधी, नगर

स्वयंसेवी संस्थांकडून चालवल्या जाणाऱ्या बालगृहांची त्रयस्थ यंत्रणेमार्फत तपासणी केल्यानंतर राज्यातील जवळपास दोनशे बालगृहांची मान्यता महिला व बालविकास विभागाने रद्द केली आहे. यामध्ये नगर जिल्ह्यातील ११ बालगृहांचा समावेश आहे. या बालगृहांची मान्यता रद्द झाल्याने बालगृहातील बालकांना अन्य अ व ब श्रेणीच्या बालगृहात स्थलांतरित करावे, असे पत्र महिला व बालकल्याण कार्यालयाने बालकल्याण समितीस पाठवले आहे. समितीकडून मात्र संबंधित बालगृहांना अद्याप आदेश दिले गेले नसल्याची माहिती आहे.

राज्यातील बालगृहांची तपासणी करण्यासाठी त्रयस्थ यंत्रणा नियुक्त करण्यात आली होती. या तपासणीचा अहवाल सरकारला मिळाल्यानंतर ही कारवाई करण्यात आली आहे. ‘अ’ व ‘ब’ श्रेणीतील बालगृहे वगळता ‘क’ व ‘ड’ श्रेणीतील बालगृहांची मान्यता तसेच बाल न्याय अधिनियमाअंतर्गत नोंदणी प्रमाणपत्र रद्द केले आहे. मान्यता रद्द झालेल्या बालगृहातील मुलांना ‘अ’ व ‘ब’ श्रेणीच्या बालगृहात स्थलांतरित केले जाणार आहे. जिल्ह्यातील ‘क’ व ‘ड’ श्रेणीतील अकरा बालगृहांच्या मान्यता रद्द झाल्या असून या बालगृहांतील मुलांना अन्य बालगृहात स्थलांतरित करणे आवश्यक आहे. याबाबत राज्य सरकारच्या महिला बालकल्याण विभागाने तशा सूचनाही दिल्या आहेत. त्यानुसार येथील महिला बालकल्याण जिल्हा कार्यालयाने बालकल्याण समितीस पत्र पाठवले आहे. मान्यता रद्द झालेल्या बालगृहांतील बालकांना अन्य अ व ब श्रेणीच्या बालगृहात स्थलांतरित करण्याच्या सूचना दिल्या आहेत. त्यानुसार पुढील कार्यवाही सुरू असल्याची माहिती कार्यालयातून देण्यात आली.

सहायक अनुदानही रद्द

राज्य सरकारने मान्यता रद्द केलेल्या संस्थांना या आर्थिक वर्षातील सहायक अनुदान मिळणार नाही. तसेच या संस्थांना नवीन बालगृहासाठी प्रस्तावही सादर करता येणार नाही. संबंधित संस्थांत येथून पुढे मुलांचे प्रवेश होणार नाहीत; अथवा, संस्थेत मुले दाखल झाल्यास त्यांना अन्य बालगृहात दाखल करण्याबाबत कार्यवाही करण्याच्या सूचना महिला व बालविकास विभागाने दिल्या आहेत. जिल्ह्यातील मान्यता रद्द झालेल्या या बालगृहात आजमितीस बालकल्याण समितीच्या आदेशाने १६५ बालके प्रवेशित आहेत.

कोट ः

जिल्ह्यातील मान्यता रद्द झालेल्या बालगृहांतील बालकांचे अन्य अ व ब श्रेणीच्या बालगृहात स्थलांतर करण्याच्या सूचना बालकल्याण समितीस दिल्या आहेत. बालकल्याण समितीस पत्र दिले आहे. त्यानुसार प्रक्रिया सुरू आहे.

– विजयमाला माने-खरात, जिल्हा महिला बालविकास अधिकारी